Svinn i matbutikkar
I boksen nedanfor er det skildra nokre tiltak for korleis ein kan kjempe mot svinn i matbutikkar. Dei to spørsmåla eignar seg godt til diskusjon i klasserommet.
Kva punkt i svinnhjulet vil dei ulike tiltaka ha effekt på?
Forklar samanhengen mellom svinn og berekraft.
Trivsel og god opplæring
Trivsel og god opplæring er kanskje det som reduserer tjuveri mest. I tillegg er kompetente og fornøgde medarbeidarar i stand til, og motivert for, å kjempe mot svinn i butikkane.
Haldbarheit og datostempling
Svinn gjennom mat som går ut på dato, har det blitt fokusert mykje på. No blir mange matvarer merkte med "best før – ofte god etter" ein dato, i staden for berre "best før". I tillegg gir butikkane ofte rabatt på varer som har gått ut på dato, eller er i ferd med å gå ut. På denne måten kan ein selje fleire varer, og ein slepp å kaste dei når dei går ut på dato.
Varesikring og alarmetikettar
Sikkerheit må inngå i dei daglege rutinane. Det gjeld òg varesikring. Der det er mogleg, skal alarmetikettar klistrast både på eska vara ligg i, og på sjølve vara. Det gjer det vanskelegare å stele til dømes kostbare hudkremar.
Førebyggje
Dei tilsette følgjer med på kundane, og overvaker butikken sin. Dei seier hei, og ser kundane i auga. Det er god service, men kan òg førebyggje butikktjuveri.