Fagartikkel
Svinn hos leverandørar
Det er viktig å velje riktig leverandør. Riktig leverandør betyr at butikken får rett vare til rett stad og rett pris.
Bilete: Jon Hauge / CC BY-NC-SA 4.0
Med leverandør meiner vi ein person eller ei bedrift som leverer ei vare. Ofte er det slik at leverandøren leverer varer til ein detaljhandel, som igjen sel til sluttkunden. I andre tilfelle, som med straum eller kabel-TV, kan det vere at leverandøren leverer direkte til forbrukaren.
Leverandørane kan gjere fleire typar feil som gir svinn. Her er nokre av dei:
- sende faktura med feil pris eller mengd
- levere ein annan varetype enn den som er bestilt
- levere varer som ikkje stemmer med bestillinga når det gjeld mengd og kvalitet
- levere varer som er gått ut på dato eller snart går ut på dato
- bruke uærlege sjåførar som stel varer på køyrerutene
Bedriftene bør derfor setje inn tiltak mot leverandørane for å førebyggje svinn. Aktuelle tiltak er å
- sjekke referansen til leverandøren, det vil seie høyre med andre kundar om dei er fornøgde, før ein vel leverandør
- sjekke om leverandøren har etiske retningslinjer
- etablere gode relasjonar med leverandørane og opparbeide gjensidig tillit