Brødskala'n viser kor mange prosent heile korn, sammale mjøl og kli det er i brødet i forhold til total mjølmengd. På emballasjen finn du eit Brødskala'n-symbol og dessutan grovleiksgrad angitt i prosent (%). Merkeordninga inkluderer ikkje innhald av frø, nøtter eller andre ingrediensar som kan ha innverknad på fiberinnhaldet i brødet. Kor grovt brødet er, kjem altså an på kor mykje sammale mjøl, heile korn og kli det inneheld.
Brødskalan er delt inn i fire kategoriar
- Fint brød: 0−25,9 prosent sammale mjøl eller heile korn
- Halvgrovt brød: 26−50,9 prosent sammale mjøl eller heile korn
- Grovt brød: 51−75,9 prosent sammale mjøl eller heile korn
- Ekstra grovt brød: 76−100 prosent sammale mjøl eller heile korn
Grovt til kvardags
Helsestyresmaktene tilrår at vi et meir grove kornvarer, og at vi vel grove og ekstra grove brød- og kornprodukt til kvardags. Grovt brød inneheld fleire næringsstoff enn fint brød. Dei grove brød- og kornprodukta er ei god og viktig kjelde til kostfiber og til fleire vitamin og mineral. Ekstra grovt brød gir to til tre gonger så mykje kostfiber som fint brød.
Ingredienslista
Finn du ikkje Brødskala'n på eit brød, må du sjekke ingredienslista for å sjå kva brødet inneheld. Dei ingrediensane det er mest av, står først.
Merkeordninga
Brødskala'n er ei merkeordning for mjøl- og bakeribransjen som vart utarbeidd av NHO Mat og Drikke og Baker- og Konditorbransjens Landsforening (BKLF) i samarbeid med Forbrukarrådet, Sosial- og helsedirektoratet og Mattilsynet i 2006. Det er frivillig for mjøl- og bakeribransjen å nytte merkeordninga. Bedrifter som anten er medlemmer av BKLF eller har signert avtale med BKLF, er godkjende for bruk av Brødskala'n.
Hugs!
- Brødskala'n er ei merkeordning som skal hjelpe forbrukarane til å velje grovt brød.
- Brød er grovt når 50 prosent av mjølet er sammale, heile korn eller kli.