Hopp til innhold

Fagartikkel

Marja Bål Nango

Marja Bål Nango (1988–) lea sámi dáiddár ja filbmadahkki. Sus leat máŋggat filmmat čájehuvvon filbmafestiválain Norggas ja olgoriikkas. Filbmaoahpu lea váldán Nordlándda dáidda- ja filbmafágaskuvllas ja Lillehammera allaskuvlla filbma- ja tv-diehtagis.

Nango nammaduvvui jagi nuorra dáiddárin Riddu Riđu riikkaidgaskasaš eamiálbmotfestiválas 2011:s. 2015:s oaččui Skårungen-debutántabálkkašumi Hilbes biigá -oanehisfilmmas. Skårungen lea 25 000 kruvdnasaš bálkkašupmi maid Nordnorsk filmsenter geige.

Eará bálkkašumit ja nominašuvnnat

  • nominerejuvvon Romssa Riikkaidgaskasaš Filbmafestivála (TIFF) Tromsøpalmenii (2015), bálkkašupmi mii geigejuvvo Film fra nord-siidoprográmma buoremus filbmii
  • ruoŧa UR-bálkkašupmi (2015)
  • válljejuvvon searvat sihke Grimstada Kortfilmfestivala ja Nordisk Ungdoms Filmfestivala gilvoprográmmii

«Halvt ditt og halvt datt»

Nango dokumentárafilbma «Halvt ditt og halvt datt» (2011) guorahallá maid mearkkaša leat máŋggakultuvrralaš. Filbma ovdanbuktá jearahallamiid olbmuiguin geat gullet máŋgga kultuvrii. Dat digaštallá gažaldagaid nugo:

  • Sáhttá go sápmelaš náitalit dážain?
  • Sáhttá go mu mánná geavahit bunáda?
  • Man giela galgat hállat ruovttus?

Geahča ođasášši filmma birra «Halvt ditt og halvt datt» NRK Nordnytt-guovlluođđasiin.

Reflekšuvdnabargu: Maid mearkkaša leat máŋggakultuvrralaš? Mat buorit ja heajos bealit sáhttet leat bajásšaddat máŋggakultuvrralaš bearrašis, go nubbi váhnen lea dáža ja nubbi ges gullá eará kultuvrii?

Sist oppdatert 25.11.2021
Skrevet av Tina Andersson, Lill Hege Anti og Davvi Girji
Rettighetshaver: Norgesfilm AS

Læringsressurser

Sámi filbmaoahppoárka