Lohkh teekstem jïh darjoeh laavenjasside!
Noere saemien nïejte maana-baeleste staaloej bïjre govleme. Geerve almetjh satnem gellien aejkien staalojste balteme juktie ij edtjh tjaatsan gahtjedh, skåajjese tjaajanidh jallh maam akt jeatjah darjodh mij vaarege. Daelie onne-åabpan ektine stoere bovresne staaren jarngesne. Nïejte bælla onne-åabpa maahta tjaajanidh dan stoere bovrese. Dan åvteste onne-åabpam Bovre-staalojne balta. Jeahta, staaloe maahta båetedh onne-åabpam vaeltedh jis ij leah gïemhpe, stoere-åabpan luvnie årrodh jïh satnem dåeriedidh mearan dah guaktah bovresne. Vååjnoe goh onne-åabpa ånnetji bïlleminie destie mestie vaarohte. Nïejten mïelen mietie buerebe onne-åabpa mestie joem bælla olles tjaajenh jallh maam joem bovresne darjoeh mij dïsse vaarege.
Akte nyjsenæjja seamma bovresne mij gåvla gaajhkem maam dïhte noere nïejte onne maanese jeahta staaloej bïjre. Nyjsenæjjan mïelen mietie eah noere almetjh edtjh naemhtie maanam dan vestieslaakan vaaroehtidh jïh beltedh. Nyjsenæjja vuajna dïhte maana bïlleje, vååjnoe aaj goh aerkie sjædta. Nyjsenæjja noere nïejtese måarahtåvva, dïsse jeahta ij edtjh naemhtie onne-maanam beltedh. Ij leah gænnah luhpie smaave maanide mestie joem beltedh. Bïllemistie maanah aerkie sjidtieh.
1. laavenjasse
Tjaelieh soptsestallemem noere nïejten jïh nyjsenæjjan gaskemsh. Mah argumenth noere nïejte pråvhka soptsestallemisnie, jïh mah argumenth nyjsenæjja pråvhka?
2. laavenjasse
Guktie maehtebe dej guaktaj ov-vaantoem buerkiestidh? Man åvteste dah guaktah joekehtslaakan ussjedeminie jïh darjoeminie?
3. laavenjasse
Giejnie datne sïemes? Buerkesth man åvteste.
4. laavenjasse
Buerkesth guktie saemien kultuvre-histovrijes vuekieh maehtieh baajnehtidh guktie noere nïejte teekstesne ussjedeminie jïh darjoeminie.
5. laavenjasse
Datne naan jeatjah daagkerem tsiehkiem måjhtijh gusnie dovletje kultuvre-histovrijes vuekieh baajnehtamme guktie almetjh daan biejjien ussjedieh jïh darjoeh? Soptsesth dan bïjre.