Edtjebe juhtedh
Piere! Dellie tjoerh tjuedtjielidh, daenbien edtjebe mijjieh juhtedh. Nahkeren leah? Juhtedh edtjebe daan biejjien. Tsåahka lea govhte!
Dellie stealladibie jïh varke byöpmedibie jïh gåårvedibie, jïh dle ryöjredibie. Maake lea joe vïnhtse-bealese vaadtsajamme, jïh mijjieh edtjebe maaken vïnhtsem dåeriedidh Nååvmesje-jaavran.
Hijven gåarede juhtedh. Låedtjie lea daan biejjien, jïh buaredh lea aaj. Goh båetebe Nååvmesje-jaavran, dellie lea bïjle desnie. Dam dåeriedibie dan loektese. Dahkoe båetebe, dellie manne vaadtsam telefovnese, ringkem akten laedtien gåajkoe mij vïnhtsem åtna. Dïhte jis jeahta, ij goh daan biejjien asth vuejedh, buaredh lea daan biejjien, suejnieh edtja gåatan voejehtjidh, elmie lea aerebe orreme, jïjnjh suejnieh ålkone. Dellie jeahta, jirrede-aereden båata varke.
Mijjieh låavtegem tseegkimh don loekten don bealan, desnie åeriejimh dam jijjem. Goh limh åarajamme, dellie reejregööti jïh gaski jïh stiehpegööti, idtjim manne man jarke dan jïjjen åadtjoeh åeredh. Manne tjoerim geehtedh maanide olles dah tjïektjh låavtegen sontere olles lovvh. Aereden åeriejimh gossege tsåahka uktsie, dellie mööki.
Tsåahka luhkie dellie manne vaadtsam jaevrie-bealese. Ij leah annje naan vïnhtse båateme. Dellie tjoerebe vuertedh iehkiedasse. Åå elmie jis, daan biejjien lea aaj, bïegke sjædta. Easkah iehkiedasse tsåahka tjïjhtje dellie loevenimh loekteste. Mijjieh öövre lovvimh. Jïh goh båetebe gaadtan, dellie tjoerebe varke vaedtsedh voessigujmie. Unnemes maanam tjoerim guedtedh. Gåatan båateme, varke dållem bïejedh jïh ohtje byöpmetjh vedtedh maanide. Dah lin syjleme jïh sïjhtin varke åarajidh.