Epihke

Tjiehpies-lidteratuvre lea tjaalege man sisvege lea såårneme jallh vaajestamme. Mijjieh maehtebe tjiehpies-lidteratuvren tjaalegh fiksjovne-tjaaleginie gohtjedh. Baakoe fiksjovne latijnen gïeleste “fictio” båata, mij lea soptsestidh, gaavnehtidh jallh saarnodh maam akt mij raakte saatnan. Tjiehpies-lidteratuvren tjaalegh maam akt ov-ryöktesth saarnoeh saetniesvoeten bïjre. Gosse lohkije maam akt låhka mij hæhtadamme, dellie dïhte maahta maam akt lïeredh dan veartenen bïjre gusnie dïhte jïjtje jeala.

Mijjieh maehtebe tjiehpies-lidteratuvrem golme åejvie-sjangeridie juekedh: lyrihke, epihke jïh draama/dramatihke. Dah eelkin tjaalegidie juekedh hammoej mietie antihke-aejkesne. Lyrihke vierse-boelhkh åtna, epihke lea soptsese, jïh dramatihke replihkh jïh scene-buerkiestimmieh åtna.

Jiehtege tjiehpies-lidteratuvre lea Frankrïjhken gïeleste lööneme, gusnie "belles-lettres" lea dïhte tjiehpies-lidteratuvre, dïhte sæjhta jiehtedh lidteratuvren ulmie lea lohkijasse estetihken dååjresem vedtedh.