Tjaalegh viertiestidh
Gosse laavenjassem åadtjoeh gusnie edtjh göökte tjaalegh viertiestidh, dellie edtjh hedtieh jïh joekehtsh gaavnedh dej göökte tjaalegi gaskem. Myth jïh båeries soptsesh leah almetjistie almetjasse soptsesovveme. Dah leah njaalmeldh vuekien mietie soptsestovveme jïh aaj vuesiehtieh guktie almetjh dejbeeli ussjedin jïh darjoejin.
Daaletji tjaalegh leah tjaalegh mijjen tïjjeste. Dah tjaalegh jallh soptsesh aaj vuesiehtieh guktie mijjieh daelie jielebe, maam ussjedibie jïh mïsse jaehkebe.
Aarvoeh
Aarvoeh tjaalegisnie mijjese soptsestieh maam tjaelije såvma vihkele jïh mij lea vihkele dan tïjjen gosse dïhte jeala/jeeli. Aarvoeh gellien aejkien vuesiehtieh mah skreejrieh jallh tsevtsieh gosse almetje edtja veeljedh maam edtja darjodh jallh maam dorje. Jis datne edtjh aarvojde tjaalegisnie gaavnedh maahtah gihtjedh:
- Maam/mïsse almetje jaahka?
- Man vihkeles lea dïhte sutnjien/dan almetjasse?
- Mah almetjidie skreejrieh?
- Mij maahta buerkiestidh maam dah darjoeh?
- Mah aarvoeh vihkeles siebriedahkesne guktie tjaaleginie leah buerkiestamme?
- Gåabpatjahki seamma aarvoeh, jallh naan joekehtsh dej gaskem?
- Gåessie dah tjaalegh båateme? Mah aarvoeh vihkeles siebriedahkesne dejnie aejkine?
Laavenjasse
Goltelh maam åemie Oskar Jåma soptsesti Gïhtjelimmieh evtiedimmien bïjre båatsosne jïh lohkh kronihkem Tïjje båateme gaatelassjedh maam Inge E. Danielsen tjeeli plaeresne Adresseavisa gierhkiengarres 14. b. 2017.
Viertesth dejtie göökte teekstide jïh ussjedh dovne tïjjen jïh aarvoej bïjre.