Åenehks draaman bïjre

Tjaelije teatere-vuasahtallemem jallh filmem juaka heannadimmiej jïh scenaj mietie. Vuesiehtimmien gaavhtan tïjjen mietie jallh sijjien mietie, goh biejjeste beajjan jallh sijjeste sæjjan.

Almetjh leah guhkede gietjeste råållah spealadamme gosse voejhkelamme jeatjah almetjinie årrodh. Medtie 2500 jaepiej raejeste dellie greekerh spealadimmiem evtiedin sjangerasse man sjïere væhtah. Gaajhke mij heannede draamesne maehtebe dallegh vuejnedh jïh govledh. Mijjieh gaajhkh persovnh/almetjh åahpanadtebe, gosse vuartasjibie jïh goltelibie maam dah darjoeh, jiehtieh jallh soptsestieh. Jis buerie replihkh jïh svihtjemh draamesne, dellie aelhkebe mijjese guarkedh jïh jaehkedh. Dellie draama jaehkemes jïh vuartasjæjjah maehtieh dahkoem dåeriedidh. Dahkoe maahta tïjjen mietie juhtedh, men naan aejkien maehtebe vuejnedh mij aerebi heannadamme jïh mij maahta heannadidh.

Dovne teaterisnie jïh filmesne vihkele dorjehtæjjaj scena-vaarjoeh sisvegasse jïh dahkose sjiehtieh. Juktie mijjieh edtjebe tïjjem jïh sijjiem dååjredh, mah dorjehtæjjah voejhkelieh skaepiedidh. Seamma vuekine kulissigujmie jallh byjresinie, v.g. mööbelinie jïh vïedtjine. Teatere- jallh filme-darjoje tjuara byjresem jïh mieriem dahkose skaepiedidh. Aarebi teatere- jïh filme-darjojh stoerre tjïehtjelh, gåetieh jïh voenh bigkin guktie draama-byjresem darjodh. Daen biejjien byjresh daata-teknologijen tjïrrh skaepiedieh.

Dah vihkielommes draama-sjangerh

• Teatere-vuasahtallemen gellie boelhkh. Fïerhtene boelhkesne gellie scenah. Akte scena, akte tsiehkie.

• Filme mahte seammalaakan goh teatere-vuasahtalleme, men jeatjah viehkie-vierhtiejgujmie.

• TV-raajroeh sïejhmemes draama-sjangere daan biejjien.

• Daata-spïele gellie ovmessie biehkieh åtna, men dahkoe jïh replihkh vihkele. Dah spïelijh leah aaj meatan spïelesne jïh dahkosne, jïh maehtieh spïelem jïh dahkoem baajnehtidh.

Draamesne gellie dorjehtæjjah maehtieh meatan årrodh mah unnebe jallh stuerebe råållah utnieh. Dah maehtieh draaman mietie jorkesidh jallh dah maehtieh seammalaakan draaman tjïrrh årrodh. Men draama aaj gååvnese gusnie ajve akte dorjehtæjja.