Tareas: Una entrevista usando un chatbot

Jobb i par og intervju ein kjend person frå Spania.

• Planlegg intervjuet saman, og gjennomfør det ved hjelp av ein praterobot.

• Undersøk kva språkroboten svarer, sjekk faktum, omarbeid språket og øv på uttale.

• Til slutt framfører de intervjuet eller speler det inn som ei lydfil. Den eine av dykk skal vere kjendisen, og den andre er journalist.

• Ein av dykk lastar ned dokumentet nedanfor og deler det med den andre slik at de kan bruke det som eit samskrivingsdokumentet mens de jobbar.

Sjå på lista over kjende personar og bestem dykk for kven de vil jobbe med. Eventuelt kan de spørje læraren om å få velje ein annan kjend person frå Spania eller Latin-Amerika.

Bruk ein praterobot, til dømes NDLAs praterobot for elevar. Be han late som han er kjendisen de skal intervjue, og be han svare på spørsmåla de stiller. Still konkrete og enkle spørsmål, men unngå gjerne ja/nei-spørsmål.

Documenta la conversación con el chatbot

Kopier samtalen med prateroboten inn i det delte dokumentet mens de jobbar. Pass på at de får med både spørsmåla og eventuelle leietekstar de skriv sjølve, og dei genererte svara de får frå prateroboten.

De kan til dømes starte slik:

• ¿Puedes pretender ser [nombre]? Me gustaría hacerte una entrevista. Kan du late som du er [namn]? Eg vil gjerne intervjue deg.

• ¿Puedes utilizar un español sencillo y contestar como si fueras [nombre]? Kan du svare på enkel spansk og svare som om du var [namn]?

Her er døme på fleire spørsmål de kan stille:

• ¿De dónde eres? / ¿De dónde es usted?

• ¿Dónde vives? / ¿Dónde vive usted?

• ¿Cómo eres? / ¿Cómo es usted?

• Cuéntame sobre tu familia. / Cuénteme sobre su familia.

• Cuéntame sobre tu carrera. / Cuénteme sobre su carrera.

• ¿Cuándo empezaste como...? / ¿Cuándo empezó como...?

De får mest ut av arbeidet med roboten dersom de forstår kva han svarer. Gir han for vanskelege svar på spørsmåla dykkar, kan de be han forenkle språket, setje om eller forklare.

Her er døme på leietekstar de kan bruke til forenkling og forklaring av språk:

• No entiendo. Eg forstår ikkje.

• ¿Puedes decirlo de una manera más fácil/sencilla? Kan du seie det på ein enklare måte?

• ¿Me puedes decir/explicar lo que significa...? Kan du fortelje/forklare meg kva ... betyr?

• ¿Puedes traducirlo al noruego? Kan du setje det om til norsk?

• ¿Lo puedes explicar en noruego/inglés? Kan du forklare det på norsk/engelsk?

Hugs å minne roboten på at han skal svare som om han er den kjende personen de har valt, om han gløymer det.

• Debes contestar como si fueras [nombre]. Du skal svare som om du er [namn].

No er det på tide å sjekke informasjonen som prateroboten har gitt dykk.

• Sjekk opplysningane de har fått, opp mot kjelder de stoler på.

• Legg ved kjeldene som de bruker i faktasjekken, i dokumentet, og kommenter om dei stadfester eller avkreftar informasjonen frå prateroboten.

Ta utgangspunkt i samtalen med prateroboten og faktasjekken de har gjennomført, slik at informasjonen de bruker, er korrekt. Start på ei ny side i dokumentet, og skriv ned intervjuet de skal framføre eller spele inn.

Kor godt forstår de intervjuet de har laga ved hjelp av prateroboten? Tilpass og omarbeid språket. Språket skal vere på eit nivå som de sjølve og medelevane dykkar lett forstår. Svara "personen"/roboten gir, skal derfor vere enkle og nokså korte.

Bestem kven som skal vere journalist, og kven som skal vere kjendis. Byt eventuelt roller halvveges i intervjuet slik at de får snakka like mykje.

• Bruk eit opplesarverktøy, til dømes i Word eller OneNote, for å lytte til manuset. Lytt og gjenta til de kan gjennomføre intervjuet med god flyt og god uttale.

• Avklar med læraren om de skal framføre eller spele inn intervjuet.