Direkte og indirekte demokrati

Undersøk og forklar kort:

1. Kva er direkte demokrati?
2. Kva er indirekte demokrati?
3. Kva er forskjellane og likskapane mellom desse to ulike formene for demokrati?

1. Undersøk korleis det direkte demokratiet i Athen fungerte, og forklar kort.
2. Undersøk korleis det indirekte demokratiet i Noreg fungerer, og forklar kort.
3. Noreg har òg teke i bruk direkte demokrati i enkelte tilfelle i moderne tid. Undersøk korleis dette blir gjennomført, og i kva tilfelle dette har blitt gjort. Forklar kort.

For borgarane i Athen i antikken betydde demokrati at dei sjølv var med på å ta avgjerder som påverka deira eige liv. Drøft påstanden:

Direkte demokrati er meir demokratisk enn indirekte demokrati.

I nyare tid har Noreg delteke i fleire krigar, som til dømes i tidlegare Jugoslavia i 1999, i Afghanistan i 2001 og i Libya i 2011. I 1999 og 2001 blei saka behandla både i Regjeringa og på Stortinget, men i 2011 blei avgjerda teken av Regjeringa åleine. Dette er mogleg etter norsk lov. Uansett blei ikkje dei norske veljarane spurde direkte i nokon av tilfella.

Å gå i krig er ei alvorleg avgjerd. Er det eit demokratisk problem at veljarane ofte ikkje får nokon direkte medverknad i slike store spørsmål, eller er eit indirekte demokrati tilstrekkeleg i slike tilfelle? Prøv å finne argument for begge synspunkta.

1. Er det praktisk mogleg å berre bruke ei direkte form for demokrati i eit moderne samfunn som Noreg? Grunngi svaret!
2. I kva tilfelle meiner du ein bør bruke direkte demokrati i Noreg?

• Galtung, I. M. A. (2018). Regjeringens plikt til å innhente Stortingets samtykke til norske militæroperasjoner (Masteroppgåve, Universitetet i Oslo). Henta frå https://www.duo.uio.no/handle/10852/64236?show=full