Skildring av bedrifta Digicurae
Digicurae lagar velferdsteknologi som gir menneske nye moglegheiter til å klare seg i heimen på eiga hand, mellom anna GPS for trygge spaserturar, varsling når pasienten forlet senga, fall-alarm, epilepsialarm, diabeteskontroll og trygg medisinering. Menneske med demens kan få auka fridom ved hjelp av sporingsteknologi.
Digicurae er eit fiktivt firma. Viss du ønsker å lage ein eigen logo, kan dette vere ein innleiande del av oppgåva.
Gruppeoppgåve
Samarbeid i grupper på tre elevar. Bli einige om kvar i nærområdet de ser for dykk at Digicurae ønsker å etablere seg.
Del 1. Reglement
La ei av gruppene ta kontakt med kommunen og spørje kva reglar som gjeld for skilt på næringsbygg. Lag ei kort oppsummering av det de finn ut, og del med dei andre.
Bestem dykk for kva bygg de ønsker å bruke i denne oppgåva. Ta kontakt med gardeigaren og spør kva krav de må ta omsyn til viss de skal setje opp skilt på bygget deira. Samanfatt tilbakemeldinga.
Del det de har funne ut, med klassen, og drøft kva rammer dette gir for oppdraget.
Oppgåve 2. Arkitekturanalyse
Korleis vil de beskrive arkitekturen i området bedrifta skal etablere seg i? Ta eigne bilete og skriv eit notat der de gjer greie for stilartar og fargar som er brukte i området.
Kva slags busetnad er tilstøytande bygg (butikkar, leilegheiter, anna)? Ta eigne bilete og beskriv området i notatet.
Kva slags materiale består overflata til bygget av? Beskriv materialbruken og set inn eigne bilete i teksten.
Ta bilete av bygget, og mål området der de skal ha skilt. Dersom det er for høgt opp eller av ein annan grunn utilgjengeleg, må de gjette dykk til måla. Bruk ein tometers tommestokk i dette arbeidet.
Gruppene presenterer observasjonane sine og analysen sin, og klassen drøftar resultata.
Individuell oppgåve: design
Lag eit forslag til verksemdsprofilering på bygget. Profileringa må vere innanfor krava frå kommunen og gardeigaren. Bruk eit biletredigeringsprogram og manipuler inn dekor på ein bil og bygg.
Lag eit forslag til dekor på ein bil som speglar identiteten til bedrifta. Finn eit bilete av ein liten kvit varebil på internett. Biletet må ha lisens som gir deg lov til å omarbeide det.
Lag eit forslag til skilting på bygningsmassen som er tilpassa arkitektur og miljø. Bruk biletet av bygget frå gruppeoppgåva.
Lag små utprøvingar til bildekor og vindaugsdekor i folie. Bli einig med læraren din kva målestokk du bør bruke. Vel ein dekor som du skjer ut i folie, og monterer løysingsforslaget ditt.
Les meir om folie som materiale og montering av folie.
Presentasjon
Presenter løysingsforslaget ditt for klassen. Under presentasjonen skal du grunngi det følgande:
val av konsept og materiale
val av storleik på logo
plassering av logo på bygg og bil