Hopp til innhald
Spel

Spel, ta val og diskuter berekraft og samfunnsansvar

Spel kan vere ein morosam og lærerik måte å jobbe med ulike faglege spørsmål og problemstillingar på. Her får du tips om tre ulike spel innan temaet berekraft og samfunnsansvar: Jeopardy, Handelsspelet og PlayDecide.
Fire ungdommar sit rundt eit bord i ein kafe og diskuterer. Dei har ein pc framfor seg og ei oppslått bok. Det er snakkebobler som står ut frå kvar av dei. Foto/Illustrasjon.
Diskuter ulike problemstillingar innan berekraft og samfunnsansvar gjennom ulike spel. Bilete: Tom Knudsen / CC BY-SA 4.0

1. Jeopardy

Jeopardy er eit spel der elevane kan konkurrere med kvarandre. Det er om å gjere å stille dei rette spørsmåla til svara i Jeopardy-brettet og få flest poeng.

Gjennomføring av spelet

  • Spelet startar med at de blir delte inn i grupper, som får tildelt kvar sin lyd.

  • Gruppa som startar konkurransen, får velje ein kategori og ein vanskegrad, til dømes “Distribusjon 200”.

  • Læraren les opp svaret, og den første gruppa som lagar lyden sin, får stille spørsmålet.

  • Svarer gruppa med riktig spørsmål, får dei tildelt dei poenga som denne luka har. Dei får òg velje neste luke som skal opnast.

  • Svarer gruppa feil (hugs at om de gløymer spørsmålsformulering, blir det automatisk rekna som feil), blir dei trekte dei poenga som står på luka. Dei andre gruppene kan deretter få lov til å svare.

  • Laget som har flest poeng når alle lukene er opna, har vunne! 🎉

Tips til lærar

  • Som førebuing bør du skrive ned kva som er dei riktige spørsmåla til dei ulike lukene (slik at du undervegs i spelet kan vere sikker på om det gruppene svarer, er rett eller gale).

  • La det vere 3–5 elevar i kvar gruppe.

  • Lyden de skal bruke for å avgi svar, kan anten vere at elevane får eit objekt de skal lage lyd med, eller at de skal rope eit kodeord for gruppa.

  • Noter poeng undervegs i spelet.

  • Bruk mellomromstasten for å få riktig svar fram i luka når ei gruppe har svart riktig.

  • Du kan seinare lage dine eigne Jeopardy-brett på JeopardyLabs.

2. Handelsspelet

Handelsspelet er eit interaktivt spel om det globale handelssystemet. Spelet viser korleis ulike føresetnader og urettferdige strukturar fører til auka forskjell mellom land, og korleis produksjon og handel kan føre til klimaendringar.

Gjennomføring av spelet

Changemaker: Beskriving av korleis spelet blir gjennomført

3. Spel PlayDecide: plast

Spelet kan brukast til ulike tema. På førehand bør de ha jobba med det temaet de vil bruke i spelet. Lenger nede finn de eksempelressursar til temaet plast.

Gjennomføring av spelet

Spill PlayDecide og diskuter eit valt tema.

Spelereglar og spelmateriell til PlayDecide finn de i artikkelen "Spel PlayDecide!"

Etter ein introduksjon av temaet fordeler spelarane seg i grupper. Alle spelarane skal ha eit spelebrett framfor seg. Spelkort og anna spelmateriell skal plasserast midt på bordet. Dei ulike spelkorta skal gradvis fylle opp spelebrettet.

Saman skal de diskutere dykk fram til eit felles standpunkt om temaet. Finn ut kva du sjølv meiner, lytt til dei andre og forsøk å bli einige om eit standpunkt.

Kort introduksjon og tips til temaet plast

Plast er eit nyttig materiale, men her er 11 kjipe faktum om plast:

Plast er eit allsidig materiale som blir nytta i eit breitt spekter av produkt, som til dømes klede, elektronikk og medisinsk utstyr. Plastprodukt er ofte lette, varige og vannbestandige. Men plast er eit stort miljøproblem. Det tek lang tid å bryte ned plasten i naturen, og han kan sleppe ut skadelege stoff. Les artiklane om problematikken rundt plast:

Emballasje og berekraftsmerking

Nye måtar å tenke emballasje på

Plasten – populær og problematisk

Forslag til diskusjonsspørsmål:

  • Kva er fordelar med plast?

  • Kva er ulemper med plast?

  • Er det mogleg og formålstenleg å erstatte plast heilt?

  • Har plasten ei framtid, eller bør han rett og slett bli forboden?