Lys-mørk-kontrast

Gråtonane mellom svart og kvit opplever vi ulikt, alt etter kva for fargar dei står saman med. Ein mellomgrå vil sjå mørkare ut saman med kvitt enn saman med svart. På same måte vil ein mellomblå farge verke lysare saman med mørke fargar og mørkare saman med lyse fargar.

Vi kallar gråtonane mellom kvit og svart for valørar. Dei ulike gråtonane har ulik lysheit.

Vi bruker også valør når vi beskriv lysstyrken i dei kulørte fargane. Lysheitsgraden i ein farge kan målast i forhold til gråtoneskalaen.

Gul er den lysaste fargen, og lilla er den mørkaste. Ved å blande inn kvitt eller svart endrar vi valøren i fargane og får ulike nyansar.

Kontrasten mellom lys og mørk oppstår når lyse og mørke fargar blir plasserte saman. Dette kan du bruke til å skape spenning i ein komposisjon.

Vi kan også bruke lys-mørk-kontrast til å skape djupneverknad. Ved å gjere fargane lysare innover i eit bilete kan vi skape ei kjensle av at noko er nært og noko anna er lenger unna.