Tallerkenmodellen

• Halvparten bør vere grønsaker, bær og frukt.
• Ein fjerdedel bør vere karbohydratrike matvarer som brød, poteter, ris og pasta.

• Ein fjerdedel bør vere proteinrike matvarer som fisk, kjøtt, egg, belgvekstar og meieriprodukt.

Modellen kan hjelpe deg med å forstå kva du bør ete, og kor mykje av kvar matvaregruppe du bør inkludere i måltida dine. Tallerkenmodellen kan brukast til alle måltida i løpet av dagen, ikkje berre middagsmåltidet. Ved å bruke denne modellen som hjelpemiddel kan det vere lettare å ete plantebasert og få i deg nok frukt og grønt kvar dag. Det er lurt å veksle mellom ulike kjelder til protein og karbohydrat i løpet av veka.

Det er viktig å ete ei variert mengde av ulike typar frukt, bær og grønsaker fordi dei inneheld ulike næringsstoff som kroppen treng. Prøv å velje frukt og grønsaker i ulike fargar, det kan nemleg bidra til å sikre at du får i deg ulike næringsstoff. Det er tilrådd å ete minst fem, helst åtte, porsjonar med frukt og grønt kvar dag, og halvparten bør vere grønsaker. Du kan bruke friske, hermetiske, frosne og varmebehandla grønsaker, frukt og bær. Moglegheitene er mange. Inntil eit halvt glas jus (1 dl) kan inngå som éin porsjon dersom han er laga av 100 prosent frukt, bær eller grønsaker.

Vel oftare fisk og sjømat, bønner og linser enn raudt kjøtt. Kostråda tilrår at du et fisk til middag 2–3 gonger i veka og bruker fisk som pålegg. Viss du et kjøtt, er det betre å velje kvitt kjøtt frå kylling og kalkun enn raudt kjøtt frå svin, storfe, sau og geit. Det er best å bruke heile og reine råvarer av fisk og kjøtt og å ete minst mogleg tilarbeidde produkt som pølser, nuggets, salami, bacon og spekemat. Det er òg lurt å velje magre produkt med lite feitt og salt. Egg er ei proteinrik råvare som kan vere ein del av eit sunt og variert kosthald.

Det ikkje er likegyldig kva karbohydrat vi et, så det gjeld å velje blant dei sunne! Kornprodukt som har eit høgt innhald av fiber og fullkorn og lågt innhald av feitt, sukker og salt, er dei vi bør ete. Fullkornpasta, grovt brød, gryn, fullkorncousous, byggris og grov bulgur eller potet er gode val.