Kveite

Kveite krev lang vekstsesong og vert stort sett dyrka på Austlandet og delvis i Trøndelag.

I 2007-sesongen vart det dyrka 381 000 tonn kveite i Noreg.
303 000 tonn av dette hadde matkvalitet. Kor mykje som vert nytta i matproduksjon, kan variere frå år til år, men forbruket er venta å liggja mellom 60 og 75 prosent årleg.

Kveitemjøl har unike bakeeigenskapar. Det inneheld protein som kan danna gluten, og toler stor innblanding av mjøl som ikkje har bakeevne.

I butikken finn du desse typane av kveitemjøl:

• sikta kveitemjøl
• sammalen kveite grov
• sammalen kveite fin
• sammalen kveite ekstra fin
• heilkorn
• kveitekim
• kveitekli (kruskakli)
• semulegryn

Sikta kveitemjøl er det bakemjølet vi nyttar mest, og det gir lette og luftige bakverk. Kveitemjøl har unike bakeeigenskapar. Det inneheld glutenprotein som gir deigen evne til å heve seg. Saman med sikta kveitemjøl kan vi nytte mykje mjøl som ikkje har god bakeevne, som byggmjøl.

I sammale mjøl er skalrestane med. Dersom vi ønskjer mjøl utan skalrestar, må det siktast. Sikta kveitemjøl er derfor heilt kvitt. Sammale mjøl inneheld meir fiber enn sikta mjøl.

Kveite inneheld i gjennomsnitt 80 prosent karbohydrat, 10–14 prosent protein, 2–3 prosent feitt og 2–3 prosent fiber.

Sjå Matvaretabellen frå Mattilsynet for nærare opplysningar om næringsinnhaldet.