Piggvar

Piggvaren lever frå fjøra og ned til cirka 80 meters djupn og finst ofte delvis nedgraven i botnlaget på sand-, grus-, stein- eller blautbotn. Piggvaren er ein aktiv rovfisk. I vaksen alder lever han hovudsakleg av annan fisk og ulike krepsdyr. Hannen vert kjønnsmoden i tre-årsalderen, hoa i fire-årsalderen.

Dei beste fiskeplassane i Nordsjøen er på fiskebankane utanfor kysten av Nord-Jylland. Mykje av piggvaren som vert omsett i Europa, kjem frå oppdrett, hovudsakleg frå Sør-Europa. I Noreg er produksjonen liten fordi piggvaren er avhengig av å få tilført forholdsvis varmt vatn. Piggvaren vert fiska med snurrevad, botntrål eller botngarn.

Piggvaren vert seld fersk i skiver, som filetar eller som heil fisk. Kjøttet er kvitt, fast, fint og svært ettertrakta. Piggvaren kan steikjast, kokast og grillast, og kjøttet har best kvalitet i september–april.

Piggvar inneheld cirka eitt gram omega-3-feittsyrer per 100 gram filet.

Sjå Matvaretabellen frå Mattilsynet for nærare opplysningar om næringsinnhaldet.