Pressekonferansar og nettverksbygging
Dersom du skal halde ein pressekonferanse, må temaet på konferansen vere spennande nok til at journalistar frå fleire medium synest det er verdt å setje av tid til å møte opp. Dette vil seie at det journalistane ventar å høyre på konferansen, oppfyller vanlege nyheitskriterium. Derfor er det ikkje alle saker som eignar seg til å bli presenterte på ein pressekonferanse.
Når du har bestemt deg for å invitere til pressekonferanse, bør leiaren av verksemda, samarbeidspartnarar eller du som kommunikasjonsrådgivar planleggje ein liten tale i forkant. I talen kan den informasjonen de ønskjer å komme med, formidlast til alle nyheitsmedia samstundes. Hugs at uttalar på ein pressekonferanse kan givast att i media som sitat. Derfor må det som seiast, vere godt førebudd.
Det er vanleg å opne for spørsmål frå salen. Då kan journalistar som sit i salen, komme med spørsmål direkte til dei som sit i panelet.
Mange redaksjonar ønskjer eksklusivitet i sakene sine. Det vil seie at dei har lyst til å intervjue hovudpersonane i ei sak aleine. Dersom du ønskjer mykje publisitet om ei sak, kan det vere lurt å setje av tid til eksklusive intervju i etterkant. Dette er vanleg blant anna ved promotering av filmar. Då blir ulike redaksjonar inviterte til pressekonferanse der dei i etterkant får eit par minutt med kvar skodespelar.
Bedrifter har ofte saker som ikkje lèt seg formidle via pressemeldingar eller pressekonferansar fordi dei ikkje har tilstrekkjeleg nyheitsverdi. I slike tilfelle har likevel kommunikasjonsrådgivarar høve til å skape merksemd om saker ved å bruke nettverket sitt. Ein kommunikasjonsrådgivar vil ofte bruke tid på å bli kjend med journalistar som skriv om tema som er viktige for bedrifta han eller ho representerer. Slik veit kommunikasjonsrådgivaren kva saker journalisten er spesielt interessert i.
For å «få napp» i ein redaksjon er det viktig for kommunikasjonsrådgivaren å selje inn saka ved å vinkle henne på ein måte som gjer at journalisten blir interessert. Redaksjonar konkurrerer ofte om å vere først ute med nyheiter og å få dei mest spennande vinklingane. Nokre gonger kan det vere lurt å tilby journalistar i nettverket ditt eksklusivitet mot at dei slår saka stort opp.
Personifisering og sensasjon er to nyheitskriterium som ofte sel. Jobbar du for eksempel i ei fiskeribedrift som har funne opp eit nytt salsprodukt, kan du personifisere saka med å tilby journalisten å intervjue ein person som har eit nært forhold til nettopp dette produktet. Noko anna bedrifta kan gjere, er å invitere heile byen til fest på torget der borda bugnar av bedrifta sine fiskeriprodukt. Slike marknadsføringsstunt får ofte store oppslag i lokalavisa. Det gjeld å tenkje kreativt, positivt og nytt.