Materiallære

Materialval er ein viktig del av produktutvikling. Du må vurdere eigenskapane til materiala i forhold til bruksområdet. Materiale kan ha ulik haldbarheit, og dette påverkar kvaliteten til eit produkt. Val av kortreiste og berekraftige materiale påverkar samfunnet og naturen positivt.

Vi deler materiale inn i harde, mjuke og plastiske materiale, alt etter kva eigenskapar dei har.

Tre og metall har evne til å bere ein konstruksjon og må formast ved hjelp av reiskapar. Ulike treslag har ulik hardleiksgrad, og vi kan dele dei inn i mjuke, mellomharde og harde tresortar.

Mjuke materiale er fleksible. Tekstil er tøy og produkt som blir laga av fibrar. Fibrane kan komme frå naturen eller bli framstilte kunstig. Dei kan tvinnast saman til tråd eller garn. Ulike teknikkar, til dømes veving, strikking og hekling, dannar mjuke materiale som vi bruker til klede og utstyr.

Plastiske materiale kan du forme med hendene. Leirar, pappmasjé og plastilina er plastiske materiale. Dei har ikkje noka bestemt form, men vi kan forme dei nesten som vi vil.