Om pickleball

Pickleball vart oppfunne i USA i 1965. Det er med andre ord ikkje noko nytt, men det er først i dei seinare åra det har blitt populært i Noreg. Pickleball er fartsfylt og lett å lære. Utstyret du treng for å spele, er relativt billig. Det er kanskje nokre av forklaringane på at spelet blir stadig meir populært?

Ballen

Ballen minner om ein innebandyball. Han er laga av plast og er kuleforma med hol.

Racketen

Racketen ser ut som ein litt stor og avlang bordetennisracket.

Nettet

Nettet deler banen i to like store delar på tvers. Det heng i ei høgd på 92 cm på sida og 86 cm på midten.

Banen er like stor som ein badmintonbane, men oppmerkinga av banen er forskjellig.

Ingen volley-sone / "kjøkkenet"

På kvar side ut frå nettet går det ei sone på 2,13 meter. I denne sona kan du ikkje kan slå ballen før han har vore i bakken. Sona blir kalla ingen volley-sona eller "kjøkkenet".

Serveområde

Resten av banehalvdelen er 4,57 m lang og delt i to av ei senterlinje. Dette området er serveområdet.

Desse reglane gjeld når ein speler double, altså med to spelarar på kvart lag.

Serve

1. Serven blir slått medan den som servar, står bakanfor grunnlinja og på si side av ei tenkt linje som går ut frå senterlinja. Minst éin fot må vere i bakken bak grunnlinja.

2. Den som servar, må bevege armen i ein boge, nedanfrå og opp, og treffe ballen før racketen kjem over midja. Når racketen treffer ballen, må den fremre delen av racketen vere på eit lågare nivå enn handleddet til den som slår.

3. Den som servar, må slå ballen slik at han landar i servefeltet diagonalt på den andre sida av nettet. Serven er "inne" så lenge han landar innanfor servefeltet eller treffer ei av sidelinjene til servefeltet.

1. Serven er ute dersom ballen landar i "kjøkkenet" eller treffer nokon av linjene til "kjøkkenet", eller dersom ballen landar utanfor oppmerkinga til banen.

2. Du har berre eitt forsøk på kvar serve.

Dobbelsprett

Etter serven må ballen sprette på kvar av banehalvdelane før nokon kan slå ein volley. Å slå volley vil seie at du slår ballen direkte før han sprett i bakken.

Ingen volley-sona / "kjøkkenet"

Du kan berre tråkke innanfor kjøkkenet dersom ballen har treft dette området først. Det er ikkje lov å slå volley når du står innanfor kjøkkenet.

Tur

Kvart lag kan serve to gonger før det mistar turen til det andre laget. Ein startar med å serve frå høgre banehalvdel. Viss du beheld serven din, tek du den neste serven frå det andre servefeltet.

Når laget gjer ein feil, går serven over til neste spelar på laget, som då servar frå venstre banehalvdel. Gjer laget ein feil etter å ha serva for andre gong, går turen over til det andre laget.

Serven går til det andre laget

• dersom ballen sprett i bakken to gonger på rad på banehalvdelen til det laget som serva

• dersom du slår ballen i nettet eller utanfor banen

Poeng

Det er det laget som servar, som kan få poeng. Det laget som først får elleve poeng samtidig som det har to poeng meir enn det andre laget, vinn.