Etisk refleksjon
Som profesjonell yrkesutøvar skal du kjenne og følgje lov- og regelverk. Om lovverket seier noko om kva som er rett eller gale i ein situasjon, er du pålagd å følgje dette når du er på jobb. Det finst òg etiske retningslinjer for ulike yrkesgrupper og institusjonar som kan hjelpe deg med å velje. I eit arbeidsforhold kan du bruke kollegaene dine og dei overordna som støtte i slike valsituasjonar.
Døme Anna
Anna ber om å få ta del i andakten på avdelinga. Du er aleine og har det travelt, og du får ikkje tid til å hjelpe henne ut på fellesrommet. Du synest dessutan ikkje at andakten kan vere så viktig. Korleis forklarer du dette for Anna?
Moglege tilnærmingsmåtar til etiske dilemma
Når du står overfor eit etisk dilemma, må du spørje deg sjølv: Kva skal eg leggje mest vekt på? Nokre moglege tilnærmingsmåtar er:
- Plikt
- Du legg vekt på å gjere plikta di. Det betyr at du ønskjer å følgje skrivne og uskrivne lover og reglar.
- Formål
- Du legg vekt på at formålet med ei handling er god. Eit godt resultat er viktigare enn at du følgjer alle reglane.
- Konsekvens
- Du tenkjer mest på konsekvensane. Det valet som har færrast dårlege konsekvensar, for deg sjølv eller andre, er det beste valet.
- Sinnelag
- Du meiner at det er tanken bak som tel. Det betyr at valet må vere i tråd med det verdisynet du har, for eksempel eit bestemt livssyn.