Litterære tekstar
Aellieh maaneme
Martha Jåma daam diktem «Aellieh maaneme» tjaaleme. Martha Jåma Sveerjesne reakasovvi jaepien 1926 jïh sealadi jaepien 2016. Dïhte lohkehtæjjine barki dovne Sveerjesne jïh Nöörjesne. Dikte «Aellieh maaneme» lea gærjesne Åarjel-saemien 6. Govhtede gærja.
Bilete: Liv Karin Joma / CC BY-SA 4.0
Aellieh maaneme
man guhkiem gaatoeh.
Dov bovtsh gaarvanetieh.
Gie vuajna
mejtie dov aaltoe guadteme?
Ih vielie mijjen mievhkies
gielem soptsesth.
Mijjen vuekieh dutnjien
ammes sjidtieh.
Mohte annje lea dålle
gåetien aernesne buelieminie.
Annje gujht bovtse
jaevriebealan geadtan
tjåanghkene.
Annje gujht maaneme
baalkam gaavnh.