Case
Kristine, Hanne og Roar har kjent kvarandre sidan vidaregåande. Alle tre har teke fagbrev i vektarfaget og deretter starta vaktselskapet Atlanten Security. Firmaet spesialiserer seg på inngangskontroll for lokale bedrifter og arrangement i lokalsamfunnet.
I fjor hadde dei eit solid overskot, og dei har bestemt seg for å bruke dette til å utvide firmaet.
Dei skal i tillegg til manuelt vakthald tilby tekniske sikkerheitstiltak som alarmar og kameraovervaking til bedrifter. Dei ønskjer å tilby montering av alarm som ei pakkeløysing til kundane sine, og vurderer å inngå eit samarbeid med eit lokalt elektrofirma framfor å tilsetje eigne montørar.
Oppgåve 1
Atlanten Security har fått eit tilbod om å kjøpe inn 500 alarmar med sensorar til 200 kroner per eining. Dei bereknar 20 % i påslag for indirekte kostnader. Vel sjølv ei fornuftig forteneste. Meirverdiavgifta er på 25 %.
- Bruk sjølvkostmetoden til å rekne ut salspris inkludert meirverdiavgift for ein alarm med sensorar, utan montering.
- Gjer ei risikovurdering for ein montør ute på oppdrag. Ta høgd for alle typar uønskte hendingar, både på veg til og under oppdraget. Ta omsyn til at monteringa ofte skjer i private heimar, der vi ikkje nødvendigvis kjenner til alle forhold. Kva slags personleg utstyr er
naudsynt? Ut frå risikovurderinga lagar du ein HMS-instruks.
Oppgåve 2
Atlanten Security er eit lite vaktselskap som ønskjer å utvide. Dei har eit solid nettverk i lokalsamfunnet og god kjennskap til eit elektrofirma som dei kunne tenkje seg å samarbeide med i samband med montøroppdrag.
Dei vurderer òg moglegheita for å tilsetje eigne montørar for å ha meir kontroll sjølve. Det vil òg innebere meir personalansvar. Hanne, Kristine og Roar har diskutert dette internt, men må no ta ei avgjerd.
- Argumenter for og imot å samarbeide med eit elektrofirma og å tilsetje eigne montørar. Kva konsekvensar vil det få, og kva er den beste konklusjonen?
Oppgåve 3
No som Atlanten Security har ein pris og har bestemt korleis dei skal gjennomføre tenesta, må dei marknadsføre den nye tenesta overfor kundane.
- Lag ein plan for kampanjen, som inneheld målgruppe, ansvarsfordeling og tidsskjema.
- Føreslå eigna kanalar, reklamemateriell og eit slagord for kampanjen.
Aktuelle kompetansemål
Forretningsdrift
- vurdere, berekne og tilpasse pris på eit produkt med tanke på kostnader og marknadssituasjon
- gjennomføre og dokumentere arbeid i samsvar med gjeldande regelverk for helse, miljø og sikkerheit
Marknadsføring og innovasjon
- selje eit produkt og gjere greie for salsprosessen
- lage ein enkel marknadsplan og gjere greie for val av mål og verkemiddel
Kultur og samhandling
- gjere greie for og vurdere korleis partane i arbeidslivet samarbeider for å utvikle eit betre arbeidsliv
- reflektere over ulike former for relasjonsbygging og forklare betydinga av nettverk