Energiøkonomisering

I 1980 starta det dåverande Olje- og energidepartementet enøkkampanjen sin. Det blei etablert gunstige låneordningar til enøktiltak både for industrien og for private. Desse blei derimot fjerna i 1993. Trass i dette voks enøkarbeidet vidare. I 2001 blei statsføretaket Enova oppretta, og sidan då er det Enova som har prioritert dei nasjonale enøkmidlane.

Det finst mange tiltak vi kan bruke for å energiøkonomisere ein bustad. Nokre tiltak har lita eller inga investeringsutgift, mens andre tiltak krev større investeringar.

Tiltak som ikkje krev investeringar

• slå av lyset når du går ut av eit rom
• senke innetemperaturen med nokre gradar
• ikkje la vindauge stå i luftestilling i fleire timar
• fylle oppvaskmaskina og vaskemaskina før du set dei i gang
• bruke dusj i staden for badekar
• stille ned termostaten på varmtvasstanken til 65 gradar

Tiltak som krev litt investering, men som er enkle

• byte til sparedusj
• byte til LED-lys
• setje tetningslister i ytterdører og vindauge
• bruke termostatstyring på oppvarminga

Større elektriske og ikkje-elektriske tiltak

• etterisolere veggar, tak og golv
• montere godt isolerte ytterdører
• bruke varmepumpe
• installere system for byggautomatisering og smarthus

I slutten av dette temaet skal vi sjå litt på miljøkonsekvensane ved slike investeringar og litt på korleis vi i framtida skal løyse utfordringane vi har i samband med elektrisk energi (økonomisk, lokalt og globalt).