HMS-mål i petroleumsindustrien

Operatørselskapa, som Equinor, Aker BP, Shell, Exxon, ConocoPhillips og så vidare, har det overordna ansvaret for tryggleiken for felta der dei har vunne utvinningsløyvet.

Styresmaktene, industrien og fagforeiningar er einige om at det skal vere strenge HMS-krav til petroleumsaktivitetar på norsk kontinentalsokkel. Under relatert innhald finn du ei lenkje til Havindustritilsynet, og der kan du lese meir om dette såkalla trepartssamarbeidet.

Det er òg semje om at HMS-standarden skal vere under kontinuerleg betring. Dette er nedfelt i lovverket.

Operatørselskapa har ambisiøse mål for HMS-arbeidet sitt. "Nullvisjon" er eit kjent omgrep og beskriv mål om null skadar, null dødsfall og null ulykker. Alle selskapa legg til grunn at det heile tida blir arbeidd for at HMS skal bli betre – dette kallar vi kontinuerleg betringsarbeid. Ny teknologi eller nye arbeidsprosedyrar kan ofte betre HMS-standarden vesentleg. Selskapa forventar at alle tilsette bidreg til god HMS-kultur og -haldning.

Equinor seier følgjande om nullvisjonen sin:

Sikkerheten og tryggheten til våre medarbeidere, og integriteten til vår virksomhet, har høyeste prioritet. Vi mener at alle ulykker knyttet til mennesker, miljø og eiendeler kan forebygges.

Havindustritilsynet (Havtil) definerer HMS-kultur slik:

Kultur kan defineres som den kunnskap, de verdier, normer, ideer og holdninger som preger en gruppe mennesker. Vi kan få innsyn i kultur ved å se på hva folk gjør og høre på hva de sier. Det er nettop i forholdet mellom hva folk sier og hva de gjør, at det er mulig å få innsyn i virksomhetens HMS-kultur. Ord og handling må samsvare. Kultur handler ikke bare om kunnskap, verdier og holdninger. Kultur handler også om teknologi, økonomi, lover og regler og andre betingelser som påvirker oss i det daglige

I definisjonen blir det lagt stor vekt på godt samsvar mellom det folket gjer, og det som blir sagt. Det betyr at alle som arbeider på norsk sokkel, skal bidra aktivt til at måla for HMS blir oppnådd. Åtferda til den enkelte, haldning, samarbeid og etterleving av prosedyrar og tryggingsrutinar må alltid vere i tråd med HMS-måla.

God kvalitet og god HMS heng saman.

For å få god kvalitet på arbeidet er det naudsynt å følgje prosedyrar og å utføre arbeidet på ein sikker måte. God kvalitet er å gjere arbeid godt og grundig første gong for å sleppe å gjere ting om igjen. God kvalitet fell derfor saman med grunnlaget for god HMS: følgje prosedyrar, ha god kommunikasjon i arbeidsteamet, innhente arbeidsløyve og vurdere og redusere risiko.

Equinor (u.å.). Helse, sikkerhet og sikring. https://www.equinor.com/no/sustainability/health--safety-and-security.html

Havindustritilsynet (2003). HMS og kultur. https://www.havtil.no/contentassets/9642e5ca1bb14023b4f59283d703f868/hmskulturnorsk.pdf

Rammeforskriften (petroleumsvirksomheten). (2010). Forskrift om helse, miljø og sikkerhet i petroleumsvirksomheten og på enkelte landanlegg (FOR-2010-02-12-158). Lovdata. https://lovdata.no/forskrift/2010-02-12-158