Soptsesh, vuelieh, dikth jïh jeatjah teeksth soptsestieh guktie almetjh jealeme, ussjedamme jïh domteme tïjji mietie. Gosse mijjieh teeksth lohkebe dellie maehtebe aelkedh ussjedidh, maam akt lïeredh jallh måarahtovvedh. Lissine teeksth maehtieh mijjem faepieldidh jallh madtjeldehtedh.

Fïerhten biejjien mijjieh teeksth lohkebe, jïh jeenemes aamhtese-teeksth. Dellie lohkebe mij veartanisnie heannede gusnie jielebe. Aamhtese-teeksth leah teeksth goh tjåanghkoe-referaath, prievieh, kååserijh, esseyh, faage-teeksth, lohkije-teeksth j.n.v.

Essaye lea akte aamhtese-teekste gusnie tjaelije lohkijem meatan vaalta åssjaldahke-vaanterdimmesne akten vihties teeman tjïrrh.