Aktene faage-teekstesne tjaelije tjuara bagkesidie buerkiestidh, jïh vuesiehtidh guktie ussjedamme. Sïejhme tjaelije tjuara aktem jallh jienebh gaaltijh nuhtjedh, jïh vihkeles gaaltijh reaktoelaakan utnedh jïh neebnedh. Gosse tjaala, dellie tjuara iktegisth tjïelke årrodh, mah åssjaldahkh mah leah tjaelijen jïjtse åssjaldahkh jïh mah åssjaldahkh tjaelije lea veedtjeme mubpiej teekstijste. Skuvle-laavenjassine muvhten aejkien datne bïevnesem åadtjoeh maam gaaltijidie jallh mah gaaltijh edtjh våaroeminie utnedh.
Gosse datne edtjh faage-teekstem skuvlesne tjaeledh dellie vihkele datne dov maahtoem teeman bïjre vuesehth. Dellie edtjh dov maahtoem nuhtjedh gosse teeksth digkedh, åehpiedahtah jallh viertesth. Kaanne laavenjassesne tjaaleme edtjh teemam gaavnedh, vierhkie-vierhtieh viertiestidh ovmessie teekstine guktie filmem jïh diktem, novellam jïh diktem, guvvie-raajroem jïh teekstem. Gosse datne edtjh teeksten bïjre ussjedadtedh dellie vihkele datne dov åssjaldahki bïjre tjaalah. Mujhtieh teekstem eensilaakan bigkedh jïh tjïelke tjaeledh guktie aelhkie datnem guarkedh.
Vihkeles baakoeh
Viertiestidh: dellie edtjh joekehtsh jïh hedtieh vuesiehtidh v.g. göökte teekstine. Mujhtieh teemam, sisvegem, dïjrem jïh hammoem viertiestidh.
Tjïelkestidh: dellie edtjh dov maahtoem teeman bïjre eensilaakan buerkiestidh.
Toelhkestidh: dellie edtjh tjaeledh maam teekste mijjese jeahta. Tjoerh ovmessie biehkieh teeksteste analyseradidh jïh dan mænngan soptsesth mij teeksten teema, sisvege jïh dïjre.
Analyseradidh: dellie edtjh ovmessie biehkieh teeksteste lahtestidh jïh lahtesth aaj guktie teekste bigkeme.
Mïelem utnedh: dellie edtjh dov mïelem jïh vuajnoem tjaeledh teeman bïjre.
Åehpiedehtedh: v.g. edtjh tjaelijen jallh gærjan bïjre tjaeledh.