Baajh guvviem jieledh!
Ussjedh akte måaladamme guvvie meehti dan jïjnjh almetjh gåaskodh. Altan tjïelte dongki jïh maeksieji ihke Anders Sunna jïh Linda ”Zina” Aslaksen edtjigan graffitijem måaladidh vïedtjesne aktene noere-skuvlesne. Daate måaladamme guvvie lea gaajh stoerre, 14 meeterh jollehke jïh 18 meeterh gamte.
Daate tjuara sån akte dejstie stööremes saemien måaladamme guvvijste årrodh. Jïh daelie gaajhkesh dovnesh daam måaladamme guvviem digkiedieh. Men gaajhkesh hov daejrieh Anders Sunna lea åehpies dan åvteste digkiedimmiem sjugnede sov tjeahpojne. Guktie gosse Altan tjïelte satnem birri måaladidh dellie sån aaj tjoeri daejredh maam darjoeji.
Jeenjesh eah daam måaladamme guvviem lyjhkh, jïh sijhtieh guvvie edtja vïedtjeste vaaltasovvedh jallh jeatjahtovvedh. Mubpieh billieh daate måaladamme guvvie edtja saemide tsevtsedh!!! Men saatnan!!!! Maam mijjen bïjre vienhtieh????? Baajh guvviem årrodh. Ajve akte guvvie.
Anna Nilsen
1. laavenjasse
Lohkh lohkije-teekstem «Baajh guvviem jieledh!» maam Anna Nilsen lea tjaaleme jïh vaestedh gyhtjelasside.
- Man bïjre lohkije-teekste?
- Mij Anna Nilsenen vuajnoe daan aamhtesen bïjre?
- Dïhte tihtelem veeljeme mij hijvenlaakan sjeahta? Man åvteste? Man åvteste ij?
- Mah baakoeh tjaelijie nuhtjie mah vuesiehtieh dïhte digkede?
- Gïese tjaala?
- Tjaelije buektehte ulmie-dåehkiem jaehkiehtidh? Man åvteste? Man åvteste ij?
2. laavenjasse
Vaestedh Anna Nilsenen lohkije-teekstem.
Veeljh aktem daejstie råållijste:
graffiti-tjiehpiedæjja
pensjovniste 70 jaepien båeries
tjirkije aktede nöörjen politihkeles krirreste
tjeahpoeskuvle-lohkehtæjja, 25 jaepien båeries