Rollespel om blogging

Tenk nøye gjennom den rolla du har fått, før rollespelet startar. Rollespelet er effektivt dersom du opplever ubehaget med å måtte ta ei vanskeleg avgjerd.

Eit firma tek kontakt med deg og seier dei vil sende deg gratis klede. Det einaste dei vil at du skal gjere, er å skrive positivt om kleda i bloggen din. Du skal ikkje reklamere, men skrive det som eit vanleg blogginnlegg. Kva ville du gjort? Kvifor ville du gjort det slik?

Roller:

• 1 bloggar som får tilbod frå firmaet

• 1 representant for firmaet

• 1 bloggar som allereie har kontrakt med firmaet

• 1 klassekamerat som er mot kommersiell blogging

Ein god ven av deg har for ei stund sidan oppretta ein blogg. Du er innom og les bloggen ein dag og ser at fleire av venene dine er hengde ut i ulike innlegg. Det er lagt ut bilete frå festar og skrive kommentarar som ikkje er så hyggjelege. Kva gjer du?

Roller:

• 1 elev som ser at venene er hengde ut på bloggen

• 1 bloggar som har laga bloggen

• 2 klassekameratar som er med på bileta frå festen