Oppgåve
Oppgåver om emneframheving og lesbarheit
Namnet ditt: Eg er glad i å teikne og jobbe med idear, men eg likar også rammer og reglar. Denne fonten passar godt til meg, då han viser begge delar. Kreativ strek, med hjelpelinjer som held orden. Bilete: Ellen Johansen / CC BY-SA 4.0
I denne oppgåva skal du bruke det du har lært om emneframheving og lesbarheit til å finne ein font som er «heilt deg».
- Skriv ned nokre få ord om kva som er typisk deg. Kanskje du er leiken, hardtarbeidande, smart, jålete, distré, seriøs, nøyaktig eller klønete?
- Tenk over kva slags fontar som kan representere beskrivinga du har laga av deg sjølv.
- Søk på sider der du kan laste ned gratis fontar for fri bruk, og sjå om du finn ein som kan passe. Eit eksempel på ei slik side er Dafont.
- Skriv namnet ditt stort på eit A4-ark med den fonten du har valt.
- Under namnet ditt skriv du kort kva for personlege eigenskapar du har teke utgangspunkt i. Bruk 12 pkt. Verdana til denne informasjonen.
- Midtstill all teksten.
Skriv ut arka dykkar og lag utstilling i klassen.
Bilete: Ellen Johansen / CC BY-SA 4.0
Skriv ned orda nedanfor og finn ein font som underbyggjer og emneframhevar tydinga i ordet.
- barnebursdag
- romantikk
- antikvitet
- metall
- action
- eksplosjon
- pensjonistforeining
- verkstad
- svevn
- MC-klubb
Samanlikn med andre i klassen. Er de einige om kva slags stil som passar best?
Søk på nett og gå gjerne i skulen sine areal og på biblioteket. Samarbeid to og to.
- Finn og ta bilete av to–tre eksempel på skriftlege tekstar som i hovudsak bruker lesbare skrifttypar.
- Finn og ta bilete av to–tre eksempel på skriftlege tekstar som i hovudsak er emneframheva.
- Finn og ta bilete av to–tre eksempel på skriftlege tekstar som er litt begge delar.
- Diskuter korleis dei enkelte eksempla fungerer i samanhengen sin, og plukk ut tre av dei som de presenterer for dei andre i klassen.