Helse- og omsorgstenestelova
Kommunen har plikt til å gi alle innbyggjarar gode levevilkår. Lova legg vekt på sju punkt:
- førebygging, behandling og tilrettelegging for meistring
- sosial tryggleik, gode levevilkår for vanskelegstilte og likeverd og likestilling
- sjølvstende og eit meiningsfullt tilvære for den enkelte
- kvalitet og likeverd i tenestetilbodet
- tilgjengeleg tenestetilbod tilpassa behova til den enkelte
- respekt for integriteten og verdigheita til den enkelte
- best mogleg utnytting av ressursane
Når du oppheld deg i ein kommune, skal du vere trygg på at du får nødvendige helse- og omsorgstenester. Det gjeld om du bur fast i kommunen, er på besøk hos vener og familie eller om du er på ferie eller anna mellombels opphald der.
Legevakt er eit døme på eit slikt ansvar kommunen har, men du har òg krav på andre nødvendige helse- og omsorgstenester, som heimebaserte tenester, sjølv om du ikkje er fastbuande i kommunen. Dersom det er fengsel i kommunen, har kommunen ansvaret for helse- og omsorgstenester der.
Bur du fast eller mellombels i kommunen, har du krav på å få helse- og omsorgstenester på eit forsvarleg nivå. Har du eit behov som må følgjast opp med til dømes hjelpemiddel, tilrettelegging eller helseoppfølging, er det kommunen som har ansvaret. Døme på dette kan vere Nav, helsestasjonen for ungdom, heimebaserte tenester eller fastlege.
For nokon kan det vere behov for brukarstyrt personleg assistent (BPA) fordi heimebaserte tenester ikkje er tilstrekkeleg. I BPA-ordninga er brukaren arbeidsleiar, men det er ansvaret til kommunen å følgje opp, gi opplæring og tiltak til dei som treng det.
Kommunen har plikt til å finne bustader for vanskelegstilte. Det kan vere kommunale bustader eller bustader kommunen leiger av andre. Vanskelegstilte er personar som av ulike årsaker ikkje kjem inn på bustadmarknaden på grunn av helsetilstand, nedsett funksjonsevne eller alder.
Utfordringar til deg
- Kva legg du i omgrepet "nødvendig helsehjelp"?
- Kven har krav på nødvendig helsehjelp i kommunen?
- Korleis kan kommunen sikre kvalitet og likeverdigheit i tenestetilbodet samtidig som ressursane skal utnyttast best mogleg?
Helse- og omsorgstenestelova. (2011). Lov om kommunale helse- og omsorgstjenester m.m. (LOV-2011-06-24-30). Lovdata. https://lovdata.no/lov/2011-06-24-30