Del informasjon med QR-kodar
Ein QR-kode er grafisk. Du skannar koden med foto-appen på mobilen din eller ein kodelesar og får opp informasjon.
QR-kodar er nyttige å bruke når vi er på farten. QR-kodar dukkar opp når vi skal
finne reisetider og bestille billett på buss, båt eller tog
sjå meny og bestille mat på restaurantar
opne nettsider, filer og PDF-ar på ein enkel og rask måte
finne meir info om noko vi ser (som ein plakat med info om eit arrangement)
registrere påmeldingar eller legge inn korte svar i skjema
Det passar best å bruke QR-kodar når mobilen er den primære, digitale flata, og når det er nett-tilgang. Til dømes passar det med QR-kodar
på plakatar, flyers og annonsar i aviser
på stader der mange ferdast og har behov for ein bestemd type informasjon knytt til ein stad, som på ein togstasjon, ein flyplass eller ein skule, eit bibliotek eller eit sjukehus
på emballasjen til matvarer, kosmetikk og elektronikk, der QR-koden kan gi tilgang til info om bedrifta eller produktet
på utstyr eller i bruksrettleiingar der det er nyttig med meir informasjon, som ein lengre guide eller ein instruksjonsvideo
Innhaldet må vere lett å opne. Ikkje del store, tunge filer som det tek lang tid å laste opp.
Innhaldet må vere kortfatta og tilpassa mobil. Tekstar kan delast opp med punktlister, bilete bør ikkje vere for store, og videoklipp må ikkje vere så lange.
Ikkje lag for store QR-kodar. Skriv vi ut ei heil A4-side med QR-kode, er det vanskeleg for QR-skannaren å skanne heile koden, og brukaren må gå bakover for å sikte inn koden.
La det komme tydeleg fram kva det er QR-koden leier til. I stasjonsløp med QR kan postane vere nummererte, og du kan gi kodane titlar som seier nokon om innhaldet. Dersom det er videoklipp, kan du oppgi varigheita på klippa.
Bruk gode kontrastar og gjer koden synleg, slik at det blir lett å sjå koden. Den skal skilje seg ut frå bakgrunnen, og det skal vere tydeleg at det er ein QR-kode.
QR-kodar med god kontrast til bakgrunnen er lettare å oppfatte og enklare å skanne. Svart kode på kvit bakgrunn har god kontrast (21 : 0), mens lyse fargar som gul og lysegrøn har dårleg kontrastforhold med 1.06 : 1 og 1,27 : 1. Desse er vanskelege å sjå for personar med nedsett syn, og dei kan også vere vanskelegare å skanne med mobil.
Studer QR-kodane og svar på spørsmål
Kva for nokre av desse synest du det er lett å sjå? Kvifor er det slik?
Prøv å skanne QR-kodane med telefonen. Klarer telefonen å skanne alle? Viss ikkje, kva har mobilen problem med? Kvifor trur du det er slik?
Kvifor er det viktig å bruke gode kontrastar når vi lagar QR-kodar?
Nettlesarar som Chrome og Edge let deg lage QR-kode av ei nettside du er inne på. Det gjer du ved å høgreklikke og velje "opprett QR-kode for denne nettsida".
Det finst nettsider med QR-generatorar som let deg lage QR-kodar. Nokre av desse krev innlogging, og nokon må du abonnere på. Ver klar over at ein del gratistenester som tilbyr QR-kodar, let QR-koden løpe ut etter ein kort periode.
Spørsmål
Har du nokon gong skanna ein QR-kode? I kva samanheng?
Sjå for deg at du finn ein brosjyre med lenke til ei nettside og ein QR-kode. Kva for nokon av desse måtane å opne nettsider på er nyttige for deg? Grunngi.
Kva stader på skulen kan det vere nyttig med QR-kodar, og kva slags type informasjon passar?
Nätt, Tom Heine. (2022, 6. januar). QR-kode. I Store norske leksikon. Henta frå https://snl.no/qr-kode