Grammatikk: Akkusativ

Kort repetert: subjekt, predikativ og direkte objekt

Subjekt, direkte objekt og predikativ er setningsledd.

Subjekt

• Subjektet er den eller dei som utfører handlinga.

• Døme: I setninga "Lara kjøper ein genser" er Lara subjekt, for det er ho som kjøper noko.

• Alle setningane må ha eit subjekt.

Direkte objekt

• Det direkte objektet er den tingen eller personen som subjektet gjer noko med (eller mot).

• Døme: I setninga "Lara kjøper ein genser" er ein genser objekt, for genseren blir kjøpt av Lara.

• Mange setningar inneheld eit direkte objekt.

Predikativ

• Predikativet er eit setningsledd som beskriv subjektet nærare.

• Predikativet står berre etter nokre få verb. Dei to du bør hugse på, er å vere (sein) og å heite (heißen).

• Døme 1: I setninga "Lara er motebevisst" er motebevisst predikativ. Ordet beskriv subjektet Lara nærare.

• Døme 2: I setninga "Venninna mi heiter Lara" er venninna mi subjekt, mens Lara predikativ. Predikativet gir oss namnet på venninna.

Kort repetert: Kasus

Les først dømesetningane:

1. Der Pulli ist teuer.

2. Lara kauft den Pulli.

Kvifor heiter det "der Pulli" i setning 1, men "den Pulli" i setning 2? Svaret er at tysk har det vi kallar kasus.

Kasus er endingar som viser om eit setningsledd er subjekt, predikativ eller objekt i setninga. Det er bestemmarordet som står framfor substantivet (der, ein, mein, kein osb.), som får kasusendinga.

Nominativ

Nominativ er kasusen til subjektet og predikativet. Nominativforma finn du når du slår opp i gloselister og ordbøker. Har du lært deg eit substantiv og artikkelen substantivet tar (der, die eller das), kan du derfor nominativ-forma.

Akkusativ

Akkusativ er kasusen til det direkte objektet. Og slett ikkje vanskeleg å lære! For stort sett er nominativ- og akkusativformene like. Det heiter til dømes die Jacke, das Kleid, die Schuhe i både nominativ og akkusativ.

Det er berre ved hankjønnsord i eintal du må passe på. Tabellen under gir deg nokre døme.