Klassen som ressurs (for lærarar og skuleleiarar)

Inkluderande og støttande læringsmiljø

I dagens skulekvardag er det avgjerande å skape eit inkluderande og støttande læringsmiljø der elevane utviklar seg både fagleg og sosialt. Karriere- og livsmeistringsprogrammet vårt "Klassen som ressurs" er utforma for å fremme nettopp dette. Gjennom programmet ønsker vi å styrke moglegheita for elevmedverknad, tverrfaglegheit og relevans i læringsprosessen, og vi legg til rette for at elevane skal kunne bidra aktivt til fellesskapen. Fellesskapen er fundamentet for læring, og vi jobbar kontinuerleg med å bygge eit sterkt kollektiv.

Målsetjingar

Måla for programmet er klare. Elevane skal

• sjå verdien av å bidra til fellesskapen

• lære korleis dei kan skape eit godt læringsmiljø for seg sjølv og andre

• utvikle sosiale ferdigheiter

• blir førebudd på livet både no og etter skulen gjennom ulike tiltak

Deltakarar i programmet

Programmet involverer ei rekke ressurserpersoner: elevar, kontaktlærarar, miljøarbeidar, rådgivarar, karriererettleiar, skulehelsetenesta, bibliotekar, trinnleiarar og skuleleiinga. Dette tverrfaglege samarbeidet rommar mange aspekt av skulekvardagen til eleven, og sikrar varetaking og oppfølging av desse.

Tiltak og aktivitetar

Klassemiljø

Oppstartsprogram

Kvar vg1-klasse startar skuleåret med eit todagars oppstartsprogram, der kontaktlærarane leier an. I løpet av desse dagane møter òg elevane trinnleiar, elevtenesta, faglærarar og elevfadrar i samband med arrangementet Ski-leikane og ulike fadderopplegg. Dette legg grunnlaget for arbeidet med eit godt klassemiljø frå dag éin. Som ein del av oppstarten ved Ski videregående skole er elevtenesta raskt på besøk i alle vg1-klassane for å presentere programmet "Klassen som ressurs". Deretter startar klassen planlegginga av oppstartsturen til Slora Gård. Kvar vg1-klasse er ein heil dag på garden, og dette er òg eit ledd i oppstartsprogrammet vårt.

Trivselsambassadørar

Kvar klasse vel kort tid etter oppstart tre trivselsambassadørar, som mellom anna får i oppgåve å planlegge og gjennomføre miljøskapande trivselstiltak for klassen. Desse ambassadørane speler ei viktig rolle i arbeidet med å skape eit trygt og godt læringsmiljø. Dei bidreg i arbeidet med å organisere klassens time i samarbeid med kontaktlærarane, tek opp tema som det er behov for å diskutere i fellesskap og er oppteke av at alle i klassen skal bli sette og varetekne. Skuleåret blir delt i tre periodar, slik at totalt ni elevar per klasse har denne rolla i løpet av eit skuleår. Les meir i artikkelen "Trivselsambassadørar i klassen".

Klassens time

Kvar veke har elevane timeplanfesta 45 minutt til klassens time. Denne tida er dedikert til arbeid med klasse- og læringsmiljø, der kontaktlærar, tillitselev og trivselsambassadørar står i bresjen for arbeidet i samarbeid med elevtenesta. Elevtenesta gjennomfører òg ulike opplegg gjennom året, som eit ledd i arbeidet med karrierelæring.

I vg1 er hovudtemaet sosiale ferdigheiter. Arbeidet blir kopla til karriereknappen "Meg i kontekst". Karriereknappen "Meg i kontekst" er eitt av fem område som blir trekte fram i karrierelæringsmodellen til Direktoratet for høyere utdanning og kompetanse. På Ski videregående skole jobbar vi vidare med karriereknappane "Tilpassing og motstand" i vg2 og "Val og tilfeldigheiter" i vg3.

Sjølv om enkelte elevar i klassen har ei heilt konkret rolle i arbeidet med klasse- og læringsmiljøet, er likevel nøkkelen for å lykkast at det blir skapt eigarskap blant alle elevane. Alle saman bidreg i arbeidet med å skape eit trygt og godt klasse- og læringsmiljø, og slagordet er: "Den klassen du ønsker å tilhøyre, er du med på å skape sjølv".

Klassekart

I alle klassar har elevane faste plassar, og det blir rullert på læringspartnarar. Det gir føreseielegheit og sikrar at alle elevar blir kjende med kvarandre. Dette er òg sentralt i arbeidet med å vidareutvikle sosiale ferdigheiter, som samarbeidskompetanse.

Grupperettleiing

Grupperettleiing med elevtenesta gir elevane anledning til å reflektere over og jobbe med eigne og andre sine styrkar og dessutan førebu seg på fagval og studieval. Dette blir gjort som ledd i karrierelæringsprosessen, og korleis vi jobbar for å gjere elevane våre best mogleg studieførebudde.

Skulemiljø

Fellesskap og tradisjonar

Skulemiljøet er fundamentet for trivsel og læring. Gjennom elevrådsarbeid, fellessamlingar, tverrfaglege temaveker og skulearrangement- og tradisjonar jobbar vi med å bygge ein sterk fellesskap (der alle elevar blir sette og verdsette) og det vi omtaler som "Ski-kulturen". Elevane er involverte i arbeidet med planlegging, gjennomføring og evaluering.

Elevtenesta

Elevtenesta vår speler ei sentral rolle i programmet. Elevtenesta, som består av både ressursteam og pedagogisk gruppe, arbeider førebyggande retta mot alle elevane ved skulen, og med individuell elevoppfølging. Dette sikrar at vi kan tilpasse tiltaka til dei unike behova til kvar enkelt elev, samtidig som vi jobbar heilskapleg, på individ-, klasse- og skulenivå, med fokus på både trivsel og læring.

Avslutning

"Klassen som ressurs" er meir enn berre eit program: Det er ein filosofi som set eleven i sentrum. Gjennom tydelege strukturar, tverrfagleg samarbeid, felles ansvar og fellesskap jobbar vi for at kvar elev får anledning til å vise og bruke styrkane sine. Den beste utgåva av oss sjølv blir vi saman med andre. Vi trur at den klassen eleven ønsker å tilhøyre, er hen sjølv med på å skape. La oss saman få til eit læringsmiljø der alle kan trivast og utvikle seg, både fagleg og sosialt!