Fagstoff

Trivselsambassadør i klassen

Korleis kan de som elevar skape eit trygt og godt klassemiljø der alle kjenner seg velkomne? Ein måte som har fungert bra i mange klassar, er å velje trivselsambassadørar eller trivselsleiarar. Dei kan organisere aktivitetar som gjer at alle blir betre kjende, og at det blir auka samhald i klassen.

Ei stor gruppe med elevar sit i ring på stolar i eit klasserom. I midten står ein elev med ei samanbretta avis og peiker på ein av elevane i gruppa. Alle ler og ser ut til å more seg saman. Foto. — På Ski videregående skole har dei hatt trivselsambassadørar i fleire år. På biletet har trivselsambassadørane organisert ein leik for alle elevane i klassen.

Kva er ein trivselsambassadør?

Alle ønsker å gå i ein klasse med bra miljø. For å få til det må alle bidra, men det er ikkje alltid du som elev veit kva akkurat du kan gjere. Då kan det vere fint å velje ut nokon i klassen som har eit særleg ansvar for det sosiale miljøet, og som organiserer aktivitetar som inkluderer alle elevane.

Ein trivselsambassadør er ein elev som skal arbeide for at alle i klassen har det bra. Det kan vere to til fire elevar som er trivselsambassadørar, og oppgåva kan roterast mellom dei ulike elevane i klassen. Ofte er det klassen sjølv som vel trivselsambassadørar, men dei kan òg veljast av læraren.

Trivselsambassadørane har fokus på miljøet i klassen. Dei skal bidra til at alle i klassen kjenner seg inkluderte og sette, og kan vere med å organisere sosiale aktivitetar som bygger opp eit bra miljø. Det er mange konkrete tiltak trivselsambassadørane kan gjere for å betre klasse- og læringsmiljøet. Dei kan til dømes

organisere turar og utflukter
organisere spel og leikar
avtale felles lunsj ein gong i veka
arrangere klassefest
organsiere studiegrupper som øver saman til prøver
passe på at ingen fell utanfor og alltid har nokon å vere saman med
komme med innspel til lærarar om kva dei kan gjere for å betre miljøet

Tips til val av trivselsambassadørar

Det finst mange ulike måtar å gå fram på for å velje trivselsambassadørar. Nedanfor er eit forslag til korleis de heilt konkret kan gå fram for å finne kandidatar.

Del 1: Jobb i par og intervju kvarandre

Gå saman to og to. Det er fint om de ikkje kjenner kvarandre godt frå før. Still kvarandre følgande spørsmål:

Kva liker du å gjere på fritida?
Kva for nokon positive eigenskapar har du?
Liker du å snakke med andre? Sei noko om kvifor eller kvifor ikkje.
Bryr du deg om korleis dei rundt deg har det? På kva måte viser du det, i tilfelle?
Kva liker du å gjere saman med vennene dine?
Liker du å finne på morosame og sosiale aktivitetar saman med andre? Kvifor eller kvifor ikkje?
Har du vore med på å organisere nokon sosiale aktivitetar før? Når og i kva samanheng var det, i tilfelle?

Del 2: Jobb i grupper og finn kandidatar

Set dykk saman i grupper på fire med eit anna par.
Ta ein runde i gruppa. Kvar person presenterer den dei intervjua for dei andre. Kva for nokon positive eigenskapar har den du intervjua som kunne gjere hen til ein god trivselsambassadør? Fokuser på positive eigenskapar og ver raus med kompliment.
Diskuter kven i gruppa som kunne eigne seg som trivselsambassadør (uavhengig av om hen har lyst til å stille). Kvar gruppe må komme med minst eitt, eller aller helst fleire, forslag.
Læraren skriv opp alle namneforslaga på tavla.

Del 3: Jobb i plenum og vel trivselsambassadørar

Klassen jobbar i plenum.
Dei elevane som absolutt ikkje har lyst til å bli trivselsambassadør, kan få anledning til å trekke seg frå lista på tavla.
Gjennomfør eit anonymt val der kvar elev skriv to eller tre namn på ein lapp som dei brettar saman og gir til læraren.
Læraren samlar inn lappane og tel opp kven som fekk flest stemmer, utan å avsløre kor mange stemmer kvar enkelt elev fekk.
Læraren annonserer dei kandidatane som har blitt valde til trivselsambassadør. Om de skal ha tre trivselsambassadørar, annonserer læraren dei tre elevane som fekk flest stemmer (utan å avsløre kor mange stemmer dei ulike kandidatane fekk).

Elevar står saman i aulaen på ein skule og speler eit ringspel. Foto. — Ein fin måte å få elevane til å bli betre kjende på, er å arrangere ulike spel og leikar.

Trivselsambassadørar på Ski videregående skole

På Ski videregående skole i Akershus har dei i fleire år brukt trivselsambassadørar for å engasjere elevane og skape eit godt klassemiljø, med svært gode resultat. Trivselsambassadørane på Ski organiserer sosiale aktivitetar, tek initiativ til fagleg samarbeid og er opptekne av at alle i klassen skal bli sette og varetekne.

Ski videregående skole har organisert dette på følgande måte:

Kort tid etter oppstart av skuleåret vel klassen tre trivselsambassadørar.
I løpet av heile skuleåret vel klassen trivselsambassadørar to gonger til. Skuleåret blir delt i tre, så det blir i alt valt ni trivselsambassadørar i løpet av eitt år.
Etter at klassen har valt trivselsambassadørane (i midten av kvar av dei tre periodane), samlast alle som er ambassadørar på vg1 til eit felles statusmøte der dei deler erfaringar og gjennomfører øvingar dei skal ha i klassens time. På statusmøtet får deltakarane gratis lunsj.
Oppgåva til trivselsambassadørane er å skape eit trygt og godt klassemiljø. I samarbeid med kontaktlæraren og elevrådsrepresentantane bidreg dei til å organisere klassens time.
Når trivselsambassadørane er ferdige med perioden sin, har dei ein samtale med ein tilsett i elevtenesta. Dei som har gjennomført oppdraget, kan få ein attest frå skulen til å ta med seg vidare, når dei til dømes søker jobb.

På Ski videregående skole er trivselsambassadørane ein del av eit større program for å skape auka elevmedverknad, som dei kallar Klassen som ressurs.

Slagordet til programmet på Ski videregående skole er: "Den klassen du ønsker å tilhøyre, er du med på å skape sjølv".

Du kan lese meir om dette programmet i artikkelen "Klassen som ressurs".

Tips til trivselsambassadørar

Her er nokre tips til nye trivselsambassadørar:

Spør elevane i klassen kva dei har lyst til å gjere. Lag gjerne ei undersøking.
Organiser aktivitetar som alle trivst med.
Organiser aktivitetar som bidreg til å inkludere alle og motverke klikkar.
Ikkje ver redd for å prøve noko litt nytt og annleis.
Spør læraren kva for moglegheiter de har for å organisere aktivitetar og turar i skuletida.
Snakk med miljøarbeidaren eller andre i elevtenesta om kva de kan gjere saman.

Fire elevar sit rundt eit bord. Ein elev har ein post-it-lapp i panna og sit og smiler. Foto. — Det er ofte lettare for elevane å bli betre kjende om dei jobbar saman i grupper. På biletet har elevane fått ein post-it-lapp i panna, med eit namn på ein kjendis eller ein filmkarakter, og dei andre skal prøve å gjette seg fram til kven det er.

Er du usikker på om du vil vere trivselsambassadør? Det er ingen som veit betre kva de i klassen synest er hyggeleg å gjere saman, enn de sjølve. Det einaste du treng for å vere trivselsambassadør, er lysta til å organisere noko gøy og sosialt saman med dei andre i klassen. Alle kan vere trivselsambassadør. Du kan sjølv vere med på å skape den klassen du har lyst til å gå i.

Tips til aktivitetar i klassens time:

NDLA har laga forslag til ulike aktivitetar og tema trivselsambassadørane, lærarane og tillitselevane kan velje å jobbe med i klassens time. Bruk gjerne desse forslaga, eller la dykk inspirere til å finne på noko eige:

Klassens time