Aktiv lytting
Øv på aktiv lytting
Du har kanskje opplevd at ein samtale, der du vil fortelje om noko, plutseleg kan skifte fokus. I staden for å høyre på det du seier, begynner den du snakkar med å fortelje om ei liknande erfaring. Den andre personen kan prøve å forklare deg kva du opplevde, komme med råd eller prøve å ordne opp før du er ferdig med å fortelje.
Vi skal no øve på "aktiv lytting" i ein samtale. Når du lyttar, skal du prøve å halde deg sjølv litt tilbake og la den andre få snakke. Du kan komme med oppklarande spørsmål om nødvendig, men utan å komme med eigne meiningar.
Forløp
De set dykk saman to og to. Viss talet ikkje går opp, kan ein tredje person vere observatør.
Den eine fortel noko til den andre. Det kan vere ei god oppleving, eit dilemma, ei historie eller noko som har hendt i ein tv-serie de følger med på. Bruk cirka tre minutt på å fortelje.
Den andre lyttar og prøver å bruke aktiv lytting (sjå tips i ramma nedanfor).
Byt, slik at begge får fortelje og lytte.
Aktiv lytting
Sjå på den som snakkar.
Ver merksam på kva som blir sagt.
Vis med kroppsspråk, ansiktsuttrykk og "tilbakemeldingslydar" at du lyttar. Tilbakemeldingslydar kan til dømes vere: "mmm" eller "ja".
Ikkje avbryt.
Still oppklarande spørsmål om nødvendig.
Samanfatt det den andre har sagt når hen er ferdig med å fortelje.
Ikkje kom med eigne meiningar eller snakk om eigne ting.
Reflekter saman
Når de har gjennomført lytteøvinga, kan de snakke saman om henne.
Korleis opplevdes det å lytte og å bli lytta til?
Korleis var det å halde igjen i ein vanleg samtale?
Var det noko som kjendest veldig rart?
Er det noko som kan gjere samtalen enklare eller betre?
Er det nokon erfaringar frå øvinga de vil ta med dykk vidare?
Denne oppgåva er skriven av VIP Psykisk helse i skolen.