Tannhjulspumpe

Tannhjulspumpe, òg kalla girpumpe, er mykje brukt innan hydraulikk. Som namnet seier, har pumpa tannhjul som syg inn og pressar ut hydraulikkvæske i eit hydraulikkanlegg. Korleis kan to tannhjul lage eit hydraulisk trykk?

Tannhjulspumpa

Tannhjulspumpa er ein av dei eldste og mest brukte pumpetypane i industrien. Pumpa er svært godt eigna i væskeoverføringsprosessar. Ho blir brukt i ulike industrielle system som olje- og gassindustrien, matvareindustrien og kjemisk produksjon.

Konstruksjon

Ei tannhjulspumpe består av to tannhjul som roterer inne i eit pumpekammer. Kvart tannhjul har tenner som grip inn i kvarandre og skaper eit forsegla kammer mellom seg og veggene i pumpekammeret.

Tannhjula er monterte på akslar som er drivne av ei ekstern kjelde, til dømes ein elektrisk motor. Pumpekammeret er utstyrt med innsugs- og utløpsportar. Dei tillèt væska å strøyme inn og ut av pumpa.

Ei demontert tannhjulspumpe som viser alle komponentane. Illustrasjon. — Komponentane i ei tannhjulspumpe.

Verkemåte

Når tannhjula roterer, beveger væska seg frå innsuget til utløpet gjennom dei separate kammera som blir danna mellom tennene i tannhjula og veggene i pumpekammeret.

Når tannhjula roterer, skaper dei eit vakuum i innsugområdet ved at tennene på tannhjula går frå kvarandre og skaper eit større volum. Dette vakuumet trekker væska inn i kammeret. Tennene dreg så væska med seg rundt i kammeret til utløpssida.

Når tannhjula held fram med å rotere, blir væska tvinga ut av kammera og gjennom utløpssporten ved at volumet på kammeret minkar, og det blir skapt eit hydraulisk trykk når væska blir forsøkt komprimert.

Denne sykliske bevegelsen skaper ei kontinuerleg strøyming av væske gjennom pumpa.

Prinsippskisse av ei tannhjulspumpe. Animasjon. — Her blir væska sogen inn på undersida av vakuumet som oppstår når tennene går frå kvarandre. Væska blir frakta til oversida og pressa ut av utløpet fordi det blir mindre rom til væska når tennene går saman.

Bruksområde

Tannhjulspumper har fleire bruksområde i industrien. Nokre av dei vanlegaste er:

olje- og gassindustrien: pumpar olje, drivstoff, smørjemiddel og andre typar væske i produksjon, transport og lagring av olje- og gassressursar
kjemisk produksjon: pumpar kjemikal i ulike kjemiske prosessar, inkludert dosering av reagens, overføring av råvarer og handtering av prosessvæsker
matvareindustrien: pumpar viskøse væsker som sirup, smørjemiddel og smaksstoff i matproduksjonsprosessar
produksjonsindustrien: pumpar væsker som smørjemiddel, kjøle- og skjereoljer i maskineri og produksjonsprosessar

Trykk på plussteiknet på biletet under for å sjå kva alle komponentane heiter:

Fordelar

Tannhjulspumpa har ein del fordelar i forhold til andre pumpetypar til bruk i hydraulikk:

kompakt design og enkel konstruksjon
evna til å handtere høgt trykk og høg viskositet
god nøyaktigheit og pålitelegheit i dosering og strøymingskontroll