Akslingen
Innleiing
I denne delen av oppgåva skal de dreie motstykket til delen de allereie har laga. Målet er framleis å lage ei presis passform, men denne gongen må de vere ekstra merksame på overflate, grep og finish. De skal òg bore og gjere klar delen for eventuell overflatebehandling.
Instruksjonsfilm
Denne filmen (lengde: 4:15) viser korleis de går fram for å lage delen.
Trinn 1: Dreiing utan toleransekrav
Akkurat som med første del, begynner du med plandreiing for å få ein rett ende, og deretter diameterdreiing for å etablere yttermåla.
Det er ikkje nødvendig å bruke for mykje tid på nøyaktigheit, for yttermåla er ikkje toleransesette. Ifølge Verkstedhåndboka har du fleire tidels millimeter å gå på i begge retningar.
Trinn 2: Plandreiing til rett lengde og diameter
Etter at du har snudd emnet, plandreier du bort bort overmål til rett lengde. Så må du sikre at diameteren på begge halvdelane av emnet er lik slik at du ikkje får nokon stygg overgang mellom dei.
Trinn 3: Toleransedreiing
No begynner arbeidet med den toleransesette delen av akslingen. Slik kan du gå fram:
Grovdrei ved å ta to–tre store kutt med høg mating.
Bruk skyvelære til å kontrollere måla undervegs.
Når du nærmar deg 0,5 mm frå nominelt mål, går du over til findreiing med små kutt.
Bruk mikrometer som presisjonsmåleverktøy.
Ofte trengst det fleire fine kutt og målingar mellom kutta for at sluttproduktet skal vere innanfor toleransevindauget.
Bruk toleransetabellen i Verkstedhåndboka for å vite kor nøyaktig du må vere, og i kva retning avvika kan vere. Det er viktig at du vel rett basismål på diameter i tabellen (over 18 t.o.m 30) for å finne korrekte toleranseverdiar (h7). Då kan du lese av øvre og nedre verdi for toleransen i tabellen i mikrometer (0 µm, -21 µm).
Trinn 4: Lage grep
Når akslingen er ferdig, må du lage grep på same måten som på første del:
Snu emnet og spenn det opp i mjuke bakkar. Då unngår du å skade den ferdige overflata. Har du ikkje mjuke bakkar, bruker du eit anna vernemateriale mellom bakkane og akslingen.
Serratering (mønsterpressing) gir godt grep og ein tøff look. Gir om maskina til rett turtal og olje trinsene godt før du startar.
Avslutt gjerne med dreidde riller for ekstra grep og stil.
Trinn 5: Boring og førebuing til overflatebehandling
Til slutt borar du eit lite hol i enden av delen. Holet har to funksjonar: Det reduserer vekta på delen og gjer det mogleg å henge han opp ved overflatebehandling.
Trinn 6: Smell det?
No er tida inne for å teste toleransen: Sett delane saman og kjenn at det er motstand ved at luft blir pressa ut. Når du trekker delane raskt frå kvarandre, skal det oppstå ein smell. Han signaliserer at passforma er innanfor toleranseområdet.
Vil du gå eit skritt vidare?
Bruk NDLAs 3D-printa måleboks med lydsensor og konkurrer om høgast smell i klassen!
Trinn 7: Overflatebehandling
Om du har laga delen i aluminium, kan du vurdere å anodisere han. Anodisering er ei elektrokjemisk behandling der farge blir låst inn i eit tynt oksidlag. Dette laget gir delane både vern og ein fargerik finish.
NB! Hugs at vanleg lakk og måling bygger volum. Auka volum kan gjere at delane ikkje lenger passar saman.
Oppsummering og refleksjon
De har no produsert kvar dykkar del med høg presisjon og rett toleranse.
Høyrer de ein smell når de set delane saman og trekker dei frå kvarandre? Då har de oppnådd det som trengst i industrien over heile verda: perfekt tilpassing.
Refleksjonsspørsmål:
Kva er konsekvensane dersom diameterane på kvar side av emnet ikkje er like?
Korleis påverkar overflatebehandling som lakk eller anodisering toleransen?
Kvifor er det viktig å bruke mjuke bakkar ved oppspenning av ferdigmaskinerte flater?
Teikningar
Her finn du både ei arbeidsteikning i PDF-format og to CAD-filer i ulike format slik at du kan endre på utforming og storleik om du vil.
Relatert innhald
Med Arduino, mikrofon og lysdiodar kan vi lage eit enkelt system som viser støynivå visuelt. Lagar du din eigen?