Hatytringar
Film om hatprat
Mange unge har opplevd hatytringar på sosiale medium. Her kan du sjå ein undervisningsfilm om hatprat (lengde 8:23), og om kva det gjer med oss som menneske å bli utsette for hatefulle ytringar og digital mobbing.
Tenk over og diskuter
Filmen de har sett, er frå 2017. Er døma i filmen framleis relevante, eller ser hatytringar annleis ut i dag?
Kva for konsekvensar kan hatytringar få?
Kva kan de sjølv gjere om de får hatefulle ytringar mot dykk?
Har du møtt Ølhunden Berit?
I NRK-serien Ølhunden Berit møter vi ein mann som sit bak dataskjermen og skriv hatefulle ytringar og truslar. Han bruker fleire ulike kontoar med anonyme brukarnamn. Når han blir avslørt og sjølv utsett for angrep, blir han tvinga til å få eit nytt perspektiv på livet. Sjå første episode av serien: "1. Berit".
Tenk over og diskuter
Har de sett liknande meldingar som dei i tv-serien?
Får de noko inntrykk av kvifor hovudpersonen skriv hatefulle ytringar etter å ha sett første episode? Kvar kjem hatet frå?
Korleis reagerer den kvinnelege komikaren når ho les hatytringane? Korleis stemmer dette med det de såg i undervisningsfilmen om hatytringar?
Bør det vere forbode å skrive anonymt i sosiale medium? Grunngi svaret!
Kvar går grensa?
Det er eit viktig demokratisk prinsipp at alle skal kunne seie meininga si og delta i den offentlege diskusjonen. Du har lov til å vere ueinig med andre, kritisere politikk og religion, idéar eller maktpersonar sine handlingar. Du kan òg bruke humor og satire for å nå fram med det du meiner. Det betyr ikkje at du kan seie eller skrive kva du vil.
Ifølge Politiet er dette definisjonen på ei hatytring:
Med diskriminerende eller hatefull ytring menes det å true eller håne (forhåne) noen, eller fremme hat, forfølgelse eller forakt (ringeakt) overfor noen på grunn av deres
hudfarge, nasjonal eller etniske opprinnelse
religion eller livssyn
seksuelle orientering
kjønnsidentitet og kjønnsuttrykk
nedsatte funksjonsevne
Politiet. (u.å.).
Ei sterk meining kan vere tydeleg og kritisk, men ho rettar seg mot idéar eller handlingar, ikkje mot verdet til eit menneske.
Tenk over og diskuter
Kvar går grensa for kva vi bør få lov til å seie? Kom med døme.
Eit vanleg forsvar frå dei som har skrive eller sagt noko stygt, er “Det var jo berre fleip“. Kva meiner de om ei slik unnskyldning?