Utforsk samspelet mellom religion, livssyn og politikk
Førebuing
Les artikkelen "Religion, politikk og historiske endringsprosessar" på NDLA.
Følg med i ulike medium i ein periode. Leit etter saker der de meiner religion og/eller livssyn har ei rolle. Bruk til dømes medium, talar, debattar, intervju og partiprogram.
Tips
Viss de har jobba med oppgåva "Utforsk religion i media" på NDLA, har de kanskje allereie funne nokon spennande saker?
Tenk gjennom det de jobbar med i programfag. Aktuelle emne der kan òg vere relevante her.
Viss det er vanskeleg å finne døme, kan de velje å undersøke debatten rundt forbod mot konverteringsterapi nærmare (sjå biletet over).
I klassen
Del klassen inn i grupper på 3–4 elevar, gjerne etter programfag.
I grupper
Alle legg fram dei beste sakene sine, og gruppa vel den saka dei ønsker å jobbe med. Læraren rettleier og prøver å unngå at fleire grupper vel same sak.
Undersøk kva saka handlar om. Finn gjerne fram til argument som viser fleire sider av saka.
Vurder om det finst ein historisk bakgrunn det er viktig å kjenne til.
Analyser korleis religion og livssyn påverkar saka. Bruk gjerne omgrep frå artikkelen "Religion, politikk og historiske endringsprosessar".
Felles presentasjon
Presenter funna for klassen (4–5 minutt per gruppe.)
Diskuter i klassen kvifor det er viktig å kunne noko om religion og livssyn for å forstå sakene de har lagt fram.
Vurderingsmoglegheit
Oppgåva kan òg gjerast i par. Resultata kan framførast som korte podkastar for vurdering. Nokre av podkastane blir spelte av for heile klassen, slik at alle får nytte av funna.