Geleringkost

Mat som lèt seg forme, er lettare å ete enn flytande kost. Geleringkost har ei blaut og samanhengande form. Basis i denne kosten er mat med purékonsistens eller flytande konsistens som er justert (gelert) under tillaginga. Døme på slik kost er pudding, gelé, fromasj, grateng utan klumpar, mousse og krem.

Denne kosten skal ha same næringsinnhald som normalkosten. I nokre tilfelle må vi tilsetje ekstra næring for å oppnå dette. Det kan vere ei utfordring å lage variasjon i denne typen kost. For å få gelékonsistens kan ein til dømes mose kjøtt med kjøttkraft til ein flytande konsistens og tilsetje eit tjukningsmiddel som til dømes ThickenUp.

I tillaginga kan vi nytte former slik at maten får tilbake den opphavlege forma si. Viss vi til dømes mosar kyllinglår, kan vi legge mosen i former som er forma som eit kyllinglår. Vi kan førebu eit heilt brett om gongen og fryse det vi ikkje skal nytte med ein gong. ThickenUp toler at produktet blir varma opp att. Potetmjøl og gelatin kan òg nyttast som bindemiddel. ThickenUp kan òg nyttast i kaffi, te og jus.

I tabellen under ser du korleis ein variert og næringsrik dagsmeny kan sjå ut.