Oppgåve

Korleis skrive om funksjonen til verkemiddelet?

Du har sikkert høyrt læraren din seie: "De må hugse å skrive om kva funksjon verkemiddelet har". Mange elevar synest det er vanskeleg å få dette til på ein god måte, men øving gjer meister. Her finn du både tips, øvingar og svarforslag.

Del 1: Bli kjend med teksten

Denne øvinga tek utgangspunkt i teksten "Tusen tegninger" av Karpe. Derfor bør du aller først nærlese diktet. Det vil seie at du

les diktet fleire gonger og prøver å formulere det du meiner er temaet
markerer det du meiner er dei viktigaste verkemidla i diktet
diskuterer funna med andre i klassen

Del 2: Funksjonen til verkemidla

Under kan du lese utdrag frå ulike tekstar som handlar om kva funksjon verkemiddelet kontrast har i "Tusen tegninger".

Samanlikn korleis verkemiddelet kontrast i "Tusen tegninger" blir skildra i tekst A og tekst B.
I kva tekst er dette gjort best, og kvifor?

Tekst A

Kontrastane "svart-kvitt" og "rik–blakk" gjer songen meir spennande.

Dei fører til at vi les diktet på ein annan måte. Det er lettare å tenke seg kva kvart ord betyr.

Kontrastane skaper ei negativ stemning fordi det står "svart–kvitt" og "rik–blakk".

Dei skal fange merksemda til lyttaren.

Tekst B

Kontrastane "svart–kvitt" og "rik–blakk" viser at det lyriske eget er komplekst.

Dei understrekar at vi ikkje må dømme folk etter førsteinntrykket.

Bruken av kontrastar i starten etablerer temaet: Vis toleranse for andre.

Ved å bruke kontrastar viser Karpe kva for fordommar muslimer møter.

Fasit

Tekst B er best. Alle setningane viser korleis verkemiddelet styrker temaet. I tekst A betyr eigentleg ikkje setningane noko. Dei er berre "fyll–setningar".

Del 3: Prøv sjølv!

Teksten under prøver seg på å seie noko om metaforen "For jeg var fuglen på bakken, og han var tvunget til å ville kappe vingene av meg før jeg fikk sunget", men lykkast heller ikkje denne gongen.

Skriv om slik at du forklarer korleis metaforen styrkar temaet i songen.

Metaforen "Jeg var fuglen på bakken" skal få lesaren til å sjå for seg biletet og situasjonen.

Svarforslag

Ved å bruke metaforen "Jeg var fuglen på bakken" framstiller forfattaren det lyriske eget som noko forsvarslaust, ein skremd fugl som ikkje kan forsvare seg mot "dei andre" sine blikk.
Når stemma i diktet bruker metaforen "kappe vingene av meg", viser ho korleis det kjenst å bli møtt med fordommar på grunn av namn og utsjånad: Det er som å miste fridommen, slik ein fugl mistar fridommen sin til å fly om han mistar vengene sine.
Fuglemetaforen får fram korleis det er å bli sett på som annleis og ikkje passe inn i samfunnet.

Del 4: Fullfør avsnittet

Avsnittet under handlar om rima i diktet. Det har ei eksemplarisk temasetning, gode kommentarsetningar og fine døme frå teksten.

No vil skrivaren gjerne avslutte avsnittet med å vise korleis verkemiddelet får fram temaet, men står fast. Kan du hjelpe?

Skriv tre–fire setningar.

Svarforslag

Eit sentralt verkemiddel i teksten er rim. Først og fremst er det mykje bruk av enderim. Det siste ordet rimar innimellom på andre ord: "blakk–drakk" og "hvitt–litt". I tillegg er det brukt friare rim der til dømes same vokal blir gjenteken: "Lurte på hvorfor jeg ikke tar de valga de tar / Du kan'kke gi Gud, så bare gi faen". Teksten er laga for å bli sungen, og i hip-hop er rytmen viktig. I tillegg vil visse ord bli lagt vekt på. I setninga der a-lyden blir gjenteken, blir funksjonen at teksten framstår meir aggressiv. Frustrasjonen til stemma i diktet blir forsterka mot slutten av denne strofa når rima skaper ein bestemd rytme.