Sjå nærare på ein lyrikkanalyse
Kva kjenneteiknar ein god lyrikkanalyse?
I denne modellteksten blir diktet "Hvem er det ingen ser" av Gro Dahle analysert.
Når du skriv analysar, er målet å
vise kva som er temaet i diktet
vise korleis temaet kjem til uttrykk gjennom verkemiddel
vise kvifor forfattaren bruker desse verkemidla
Altså: Målet med alt du skriv, er å vise korleis temaet kjem til uttrykk i teksten. Oppgåvene under skal hjelpe dykk med å forstå korleis de skal gå fram for å få til det, gjennom at de diskuterer ein modelltekst.
De skal gjere alle oppgåvene munnleg i grupper eller i par.
Del 1: Diskuter setningar om verkemidla
Sjå på avsnittet under. Nokre av setningane har som mål å beskrive funksjonen til verkemidla. Skrivaren viser korleis og kvifor forfattaren bruker verkemiddelet kontrast for å understreke temaet i diktet: at mor er ein hardtarbeidande slitar som må verdsetjast meir.
Ser de kva setningar det er?
Men aller tydelegast kjem temaet fram når det oppstår ein kontrast mellom metaforane i første og siste del av diktet. Mens mora i første del av diktet vart beskrive med ord som "havregrøt" og "fiskeskinn", er metaforane frå nest siste strofe nesten rojale. Metaforane "dronning" og "herskar" beskriv mora. Dessutan "krones" ho, men legg merke til at det ho blir krona i, er "smuler". Her endrar altså tonen om morsrolla seg. For sjølv om det er "smuler" ho blir krona i, så viser kontrasten mellom første og siste del av diktet at mor gjer ein uvurderleg jobb.
Tips: Kva setningar skal du unngå?
Sjå på setningane under. Dette er typiske setningar vi kan finne i elevanalysar av dikt. Kvifor er det liten vits i å skrive slike setningar i analysar?
Dette verkemiddelet gjer diktet lettare å lese.
Denne metaforen gjer diktet meir spennande.
Denne metaforen gjer at vi forstår temaet betre.
Metaforen skal fange lesaren og få henne til å sjå det for seg.
Svar
Problemet med slike setningar er at dei ikkje handlar om temaet i teksten. Vi kan kalle dei fyllsetningar. Det er setningar mange skriv fordi dei ikkje heilt veit kva dei skal skrive.
Del 2: Korleis bygge opp avsnitt?
Eit godt tips når du skal bygge opp avsnitt om verkemiddel i analysar, er å ha med desse tre elementa:
Tema- og kommentarsetningar
Temasetningane bør vise kva avsnittet skal handle om. Kommentarsetningar utdjupar.
Sitat frå teksten for å grunngi
Når du skriv om eit verkemiddel, bør du vise kvar i teksten verkemiddelet er. Då må du ha med sitat.
Funksjonen til verkemiddelet
Forklar korleis verkemiddelet får fram temaet i diktet.
Oppgåve: Finn tredelinga
Les avsnittet under. Diskuter kva setningar som er
tema- og kommentarsetningar
sitat som viser verkemiddelet
setningar som viser funksjonen til verkemiddelet
Fasiten finn de på side 2 i presentasjonen under.
Del 3: Korleis lage gode temasetningar?
Sjå på modellteksten for diktanalysen på nytt, og les den første setninga i kvart avsnitt. Dette er temasetningar.
Diskuter korleis temasetningane
gir informasjon om kva avsnittet skal handle om
skaper god struktur i analysen
skaper flyt mellom avsnitta
Del 4: Korleis skape flyt i teksten?
I avsnittet under bruker skrivaren småord og frasar som setningskoplarar. Klarer de å sjå kva ord det er?
Men aller tydelegast kjem temaet fram når det oppstår ein kontrast mellom metaforane i første og siste del av diktet. Mens mora i første del av diktet vart beskrive med ord som "havregrøt" og "fiskeskinn", er metaforane frå nest siste strofe nesten rojale. Metaforane "dronning" og "herskar" beskriv mora. Dessutan "krones" ho, men legg merke til at det ho blir krona i, er "smuler". Her endrar altså tonen om morsrolla seg. For sjølv om det er "smuler" ho blir krona i, så viser kontrasten mellom første og siste del av diktet at mor gjer ein uvurderleg jobb.
Del 5: Korleis skrive innleiinga?
Innleiinga presenterer tekst, forfattar og tema. Skrivaren har valt å starte med eit sitat frå teksten, altså det vi kan kalle ei sitatinnleiing.
Diskuter:
Korleis synest de sitatinnleiinga fungerer? Grunngi svara dykkar.
Kva andre måtar å skrive innleiingar til analysar på kjenner de til?
"Det er moren det / som går i ett med skålene", skriv Gro Dahle i diktet "Hvem er det som ingen ser" (1994). Slik svarer ho allereie i første linje på spørsmålet som er tittelen til diktet. Diktet handlar nemleg om den rolla ei mor speler i livet vårt. Ei mor som vi kanskje ikkje ser eller legg merke til.
Del 6: Korleis skrive avslutninga?
Det er mange måtar å skrive avslutningar på. Kva vil de seie skrivaren gjer i denne avslutninga?
Temaet er absolutt allmenngyldig. Morsrolla går ikkje ut på dato. Og sjølv om dagens mødrer gjerne jobbar andre stader enn berre i heimen, så er det ofte dei som både vaskar og lagar mat. Gro Dahle vil med diktet sitt vise at vi burde setje meir pris på kvardagsslitet til mor.
Del 7: Korleis lage ein god tittel?
Diskuter:
Kva kjenneteiknar gode titlar på analysar?
Kvifor trur de modellteksten har tittelen "Eit kvardagsalter"?
Tips
Vent med å lage tittel til teksten din er heilt ferdig. Då har du tenkt ordentleg gjennom kva som er temaet i diktet, og kva forfattaren vil fortelje. Først då kan du lage ein god tittel.
Relatert innhald
Korleis kan du skrive ein god diktanalyse? Her finn du ein modelltekst med tips.