Kodekammer om setningar

Kva skal elevane lære?

Dette kodekammeret har to mål. Det skal

1. utvikle metaspråket til elevane om setningsledd

2. gi elevane øving i grunnleggande setningsbygning på norsk

Fire tips:

1. Det er lurt å vise elevane kodekammeret i plenum før dei får setje i gang. Elevane kan ha ulike digitale ferdigheiter. Forklar og vis dei derfor korleis dei kan bevege seg rundt i kodekammeret ved hjelp av musetastane.

2. Det kan òg vere lurt å seie at når dei har løyst ei grammatikkoppgåve rett, må dei skrive ned koden dei får. Koden står nedst, med store bokstavar. Viss dei ikkje får med seg denne koden, er dei nøydde til å løyse grammatikkoppgåva på nytt.

3. Beveg deg rundt i klasserommet og legg merke til om nokre av elevane står fast eller mistar motet. Gi små tips, men hugs at elevane skal måtte kjempe litt for å finne dei rette kodane.

4. Det kan vere lurt å ha ei lærarrettleiing med hint og tips du kan gi elevane, med deg inn i klasserommet. Vil du få tilsendt lærarrettleiing? Skriv til oss på hjelp@ndla.no.