Slik får vi betre diskusjonar

Før du les

Sjå nærare på desse fagomgrepa før du les teksten:

Diskusjon

Ein diskusjon er ein samtale der dei som deltek, er ueinige om noko.

Dialog

Dialog er ein samtale der minst to snakkar saman og lyttar til kvarandre.

Kroppsspråk

Kroppsspråk er dei kjenslene vi viser med kroppen vår. Til dømes kan du bøye nakken for å vise at du er trist.

Saman – ikkje mot kvarandre

I klasserommet bør alle kunne diskutere fritt. Det å snakke saman om ulike tema er viktig! For at alle skal oppleve at det er greitt å diskutere, er det viktig å sjå på den du snakkar med som ein hjelpar, ikkje ein fiende. Dette gjer at de behandlar kvarandre med meir respekt. Viser de kvarandre respekt, blir det enklare å få til eit trygt og godt klassemiljø.

Ueinigheit er bra

Det er greitt å vere ueinig, men tenk over korleis du viser ueinigheit. Å angripe nokon personleg eller gjere narr er ikkje bra. Til dømes i staden for å seie "Det du seier, er dumt", kan du seie "Eg er ikkje einig i det, kan du forklare meir?"

Lytt utan å avbryte

Viss du berre er oppteken av kva du sjølv meiner, gløymer du fort å høyre kva den andre har å seie. Då blir det ingen dialog. Det er bra å lytte til kva andre seier og så legge til dine eigne tankar. Men ikkje snakk berre for å presse fram di eiga meining.

Du har kanskje opplevd at nokon begynner å prate mens du snakkar om noko som er viktig for deg? Det kjennest ikkje bra. Mange blir irriterte, og somme kan bli sinte når dei blir avbrotne. Prøv derfor å ikkje avbryte når den andre snakkar.

Kroppsspråket er viktig

Tenk over korleis du sit eller står når du diskuterer. Viss du bøyer kroppen din litt framover og held armane opne, viser du at du er interessert og open for nye idéar. Å nikke viser at du lyttar. Til dømes viss nokon fortel deg om ein film dei har sett, og du nikkar, viser det at du lyttar og bryr deg om kva den andre seier.

Finn ut om du har forstått

Vis at du forstår ved å gjenta eller oppsummere kva den andre har sagt. Du kan seie: "Så du meiner at vi bør ha kortare skuledagar?" eller "Har eg forstått deg rett når eg seier at du synest vi treng meir gruppearbeid?"

Spørsmål kan òg gjere samtalen betre og gjere at vi unngår misforståingar. Prøv: "Kva meiner du med 'fleire pausar'?" eller "Kan du fortelje meir om idéen din om eit gruppearbeid?"

Ved å følge desse råda kan alle føle at dei blir lytta til, og diskusjonane blir betre.