Fagartikkel

Materiallære

Materiale påverkar stil og uttrykk. Kva du skal lage, og korleis gjenstandane skal brukast, bør styre kva materiale du vel. Vi deler materiale inn i harde, mjuke og plastiske materiale, alt etter kva eigenskapar dei har.

Film om materiallære

Materialval er ein viktig del av produktutvikling. Du må vurdere eigenskapane til materiala i forhold til bruksområdet. Materiale kan ha ulik haldbarheit, og dette påverkar kvaliteten til eit produkt. Val av kortreiste og berekraftige materiale påverkar samfunnet og naturen positivt.

Møbelsnikkarfirmaet Lien & Lian spesialbygger innreiingar til hytter og hus. I filmen under (lengde 6:49) gir dei oss eit innblikk i tre som materiale og i korleis dei også bruker tekstil og plastiske materiale.

Video: Filmkonsulentene, Extreme Music / CC BY-NC-SA 4.0

Materiale blir kategoriserte ut frå eigenskapar

Vi deler materiale inn i harde, mjuke og plastiske materiale, alt etter kva eigenskapar dei har.

Modell som viser inndeling i plastiske, harde og mjuke materiale. Leire, pappmasjé og plastilin er døme på plastiske materiale. Metall, tre og stein er døme på harde og konstruktive materiale. Under tre deler vi inn i mjuke, mellomharde og harde tresortar og gir døme på tresortar med ulik grad av hardleik. Under mjuke og fleksible materiale deler vi tekstil inn i naturfibrar, som ull, silke og bomull og kunstfibrar, som polyamid og polyester. Illustrasjon.

Harde materiale

Tre og metall har evne til å bere ein konstruksjon og må formast ved hjelp av reiskapar. Ulike treslag har ulik hardleiksgrad, og vi kan dele dei inn i mjuke, mellomharde og harde tresortar. Selje og or er mjuke tresortar, furu og gran blir rekna som mellomharde, mens bjørk og eik er harde.

Seks ulike treslag, der delar av materialprøva er behandla med olje. Foto. — Ulike treslag der delen til høgre er behandla med olje.

Mjuke materiale

Mjuke materiale er fleksible. Tekstil er tøy og produkt som blir laga av fibrar. Fibrane kan komme frå naturen eller bli framstilte kunstig. Dei kan tvinnast saman til tråd eller garn. Ulike teknikkar, til dømes veving, strikking og hekling, dannar mjuke materiale som vi bruker til klede og utstyr.

Rullar med tekstilar. Foto.

Plastiske materiale

Plastiske materiale kan du forme med hendene. Leirar, pappmasjé og plastilin er plastiske materiale. Dei har ikkje noka bestemt form, men vi kan forme dei nesten som vi vil.

Hender lager ei krukke av leire. Foto.