Research og bruk av kjelder
Informasjon gjennom research gir kvalitet
De må ta research-fasen på alvor viss det de lagar, skal halde god kvalitet.
Innhald: På den eine sida må de ha eit solid grunnlag for innhaldet og bodskapen de skal formidle.
Formidling: På den andre sida sikrar de kvalitet på formidlinga ved å gjere research på formatet og sjangeren.
1. Research i grupper, vel oppdrag
Arbeid i grupper på tre–fire. Vel eit oppdrag.
Sportsjournalistikk
Dekk ein fotballkamp eller eit skyttarstemne (vel medium og format sjølv).
Kommunikasjonsarbeid for helsestasjonen
Lag ein video (med enkelt lydspor) om barn og oppdraging.
Humoristisk podkast for skulen
Temaet er søppelsortering som tiltak for berekraft.
2. Kunnskapar om innhaldet
Bruk søkestrategiar og skaff dykk kunnskapar om temaet for å løyse oppdraget.
Diskuter undervegs:
Kva strategiar har de for å skaffe dykk kunnskapen de treng?
Korleis sjekkar de at de har funne fram til nok og riktig kunnskap om temaet de skal jobbe med?
3. Undersøk format og sjangrar
Bruk søkestrategiar og skaff dykk innsikt i formatet og sjangeren til medieproduktet dykkar.
Finn døme på medieproduksjonar som liknar det medieproduktet de skal lage. Still spørsmål til døma de har funne:
Korleis er innhaldsformidlinga?
Kva verkemiddel og forteljeteknikkar er sentrale?
Kva for retoriske grep finn de i døma?
På kva måte er målgruppa teke omsyn til i døma?
Diskuter til slutt: Kva eigenskapar og teknikkar vil de ta i bruk i eigen produksjon? Kvifor vel de ut akkurat desse formmessige grepa? Kvar passar dei best inn i medieproduktet?
4. Presenter for klassen
Kvar gruppe presenterer sitt valde oppdrag. Vis fram kjelder. Forklar òg kva som er sentral informasjon for saka, og kvifor dette er sentral informasjon. Presenter òg utvalde verkemiddel og grep til formatet.
Relatert innhald
Ei innføring i bruk av søkemotorar på internett og kva som er forskjellen på nettsøk og det å generere tekst frå ein praterobot.