Oppgåve

Alminneleggjering og annleisgjering av religion

I desse oppgåvene skal du studere døme på alminneleggjering og annleisgjering av religion i populærkultur, journalistikk og mediekommunikasjon. Bør media stille seg kritiske eller tolerante til religiøse ytringar som bryt med allmenn forståing av religion?

Kvinne med nikab og svart heildekkande drakt i ein kiosk med magasin og CD-plater. Foto. — Medieuttrykka vi omgir oss med i dag, inneheld ei rekke referansar til religion og religiøse førestillingar. Nokre medieforteljingar knyt religion til allmenne førestillingar om det gode liv. Andre forteljingar framstiller religion som noko underleg eller skremmande.

Jobb gjerne saman to og to med desse oppgåvene.

1. Forklar omgrepa

Les artikkelen "Religion og medialisering".

Ifølge sosiologen Ann Kristin Gresaker bidreg populærkulturen både til å alminneleggjere og til å annleisgjere religionen.

Kva legg ho i desse omgrepa?

2. Religion i skrekkfilmen Eksorsisten

Den berømte skrekkfilmen Eksorsisten (1973) handlar om ei lita jente som blir besett av demonar, og viser korleis religiøse leiarar praktiserer djevleutdriving.

Les om Eksorsisten på Filmweb. Det finst òg klipp frå filmen på YouTube.

Representerer denne filmen ei alminneleggjering eller ei annleisgjering av fenomenet religion? Grunngi svaret med døme.

3. Religion og populærmusikk

Studer scenebiletet av svartmetallbandet Satyricon.

Vokalisten i Satyricon på scenen. Han har langt hår, svart singlet og svart bukse med naglar, naglearmband, tatovert overarm og eit kross som heng opp ned rundt halsen. I bakgrunnen er det kandelabrar, og veggen bak scenen er dekorert med eit stort djevelansikt og logoen til Satyricon. Bokstaven o i logoen inneheld eit korssymbol, og bokstaven y ser ut som ein totanna djevelgaffel. Foto. — Satyricon er eit norsk svartmetallband som vart etablert i 1990. Her er vokalisten i aksjon på Rockefeller scene. Legg merke til figuren i bakgrunnen og måten logoen til bandet er forma på.

Kva er ein satyr, og kvar er førestillinga om satyrar henta frå?
Kvifor har bandet teke namnet Satyricon, trur du?
Representerer musikken og måten dei opptrer på på scenen, ei alminneleggjering eller ei annleisgjering av fenomenet religion? Grunngi svaret med døme.

4. Prinsessa og sjamanen

Sjaman Durek Verrett vart for alvor kjend i Noreg då han og prinsesse Märtha Louise lanserte foredragsturneen "The Princess and The Shaman". Durek Verrett kallar seg sjaman og kjem stadig med gode råd til følgarane sine på Instagram.

Prinsesse Märtha Louise og sjaman Durek Verrett ser smilande på kvarandre. Foto. — Prinsesse Märtha Louise og sjaman Durek Verrett har reist saman på foredragsturné og deltek òg aktivt i den offentlege debatten med ei rekke kontroversielle ytringar på Instagram.

Forklar omgrepa sjaman og sjamanisme.
Les NRK-artikkelen "Kritisk til Verrett-video – meiner kongehuset bør gripa inn" frå 2023. Representerer Durek Verretts bodskap i sosiale medium ei alminneleggjering eller ei annleisgjering av religion? Grunngi svaret med døme.
Kvifor har prinsesse Märtha Louise og Durek Verrett så mange følgarar på Instagram, trur du?

4. Debatt om religiøse ytringar og kritisk journalistikk

Les NRK-artikkelen "Märtha kuttar band med pressa" frå 2024.

Er kritikken Märtha Louise og Durek Verretts rettar mot norsk journalistikk, på sin plass?
Bør norsk journalistikk vere religionskritisk?
Bør journalistar vise toleranse i omtale av personar som gir uttrykk for utradisjonelle religiøse førestillingar?

Relatert innhald

Religion og medialisering

I eit medialisert samfunn bidreg media til å forme og endre religiøse førestillingar og religiøs praksis.