Arbeidsoppdrag
Søk i offentlege postlister og saksarkiv
Mange av sakene som lokalavisene skriv om, tek utgangspunkt i offentlege postlister, saksutgreiingar og vedtak. Øv deg på å finne informasjon om lokale saker som det kan vere interessant å skrive om.
Bilete: Science Photo Library, NTB scanpix / CC BY-NC-SA 4.0
Alle kommunar i Noreg skal gjere postlistene sine tilgjengelege for offentleg innsyn. Det vil seie at alle interesserte kan sjå utgåande og innkomande korrespondanse i kommunen.
Innbyggjarane har også rett til innsyn i saker som skal behandlast politisk, og til vedtak som blir gjorde i slike saker.
Enkelte dokument er haldne unna offentleg innsyn, og dei er gjerne merkte med «u.off.» i listene. Du kan søkje kommunen om innsyn i eit dokument som ikkje skal gjerast offentleg. Blir førespurnaden om innsyn avslått, kan du klage vedtaket inn for statsforvaltaren (tidlegare fylkesmannen) via kommunen.
Oppgåve:
- Naviger deg fram til heimesidene til din kommune, og gjer eit søk i postlistene og saksarkivet til kommunen. Du kan også bruke den statlege søkjetenesta eInnsyn eller søkjeteenesta Norske postlister til å søkje etter nyheiter frå ditt distrikt. Etter kvart vil du også finne slike tenester på faktisk.no.
- Søk på fleire ulike datoar. Kva slags informasjon finn du i listene over aktuelle saker i kommunen din?
- Kva for saker, brev eller meldingar kan det vere spennande å få vite meir om?
- Last gjerne ned aktuelle dokument dersom det er mogleg. Diskuter funna i grupper eller i klassen.