Undersøkjande journalistikk

Undersøkjande journalistikk er journalistikk der journalisten arbeider systematisk med å avdekkje skjulte samanhengar, eller forhold som kan vere skadelege eller straffbare. Det kan til dømes dreie seg om maktmisbruk utført av offentlege instansar eller næringsinteresser, korrupsjon eller økonomisk kriminalitet. Metodane journalisten bruker, har mykje til felles med metodar som er vanlege i andre former for etterforsking.

Ein metode som blir brukt i undersøkjande journalistikk, er systematiske søk i register og databasar. Journalistane kan òg be om innsyn i ulike dokument som gjeld den verksemda dei undersøkjer, til dømes rekneskapsrapportar eller arbeidsmiljøundersøkingar. Dei kan òg sjekke bakgrunnen til namngitte personar gjennom å snakke med kjelder eller søkje på internett.

Ein viktig del av arbeidet til ein gravejournalist, eller researcher, er å hente inn og verifisere informasjon frå ulike kjelder. Å verifisere betyr å sjekke at informasjonen er riktig. Ofte er det andre journalistar eller programleiarar som er ansiktet utover når saka blir publisert.

Store mediebedrifter har høve til å tilsetje eigne personar som har som jobb å grave fram informasjon til bruk i bakgrunnsartiklar, reportasjar eller dokumentarar. Jo større ei mediebedrift er, dess meir spesifikke arbeidsoppgåver har ein researcher.

NRK Brennpunkt er Noregs største redaksjon for undersøkjande journalistikk. Redaksjonen formulerer mandatet sitt slik:

Oppgåva vår er å fortelje deg ting du bør vite om, men som nokon prøver å skjule.

Når ei sak blir publisert i Brennpunkt, får det store konsekvensar for dei saka handlar om. Eit døme på dette er programserien Guds utvalde (2020). Her sette Brennpunkt-redaksjonen blant anna søkjelys på økonomien i trussamfunnet Brunstad Christian Church – best kjent som "Smiths venner". Du kan sjå programmet på NRK.no: Brennpunkt: Guds utvalde.

Leiarane i Smiths venner reagerte kraftig på reportasjen. Dei hevda at dette ikkje var seriøs gravejournalistikk, men ein partisk angrepsreportasje i kjølvatnet av kritikken avisa Dagens Næringsliv i fleire år hadde retta mot dei økonomiske disposisjonane til forsamlinga.

På sine eigne nettsider har forsamlinga publisert fleire artiklar der dei presenterer ein annan versjon av saka og beskriv kor skadeleg denne reportasjen har vore for forsamlinga: Brunstad Christian Church: Få alle fakta på bordet.

Etter klager frå forsamlingsmedlemmer blei saka behandla i Kringkastingsrådet. Der fekk NRK brei støtte frå rådsmedlemmene, blant andre Vebjørn Selbekk, redaktøren i den kristne avisa Dagen:

– Det er pressens oppgave å avdekke kritikkverdige forhold, og det gjelder også i kristne miljøer. Så sier Frank Gander noe viktig om hvor krevende det er å drive kritisk journalistikk i religiøse miljøer, men det er viktig at man gjør det likevel. Også religiøs makt må utfordres, pressen har en oppgave om å utfordre og å ettergå alle typer makt, sier Selbekk.